Salmos 143 - Bible in Tzotzil de Chenalhó with Deuterocanon

La sc'an coltael ta stojol Dios li Davide

Q'ueoj yu'un David

¹ Muc'ul Dios, a'ibun li jc'ope; tuc'ulanbun li ca'yeje. Tac'bun me li jc'ope yu'un vo'ot tuc' avo'nton; mu xana' xajel avo'nton.

² Mu me xachapanun, vu'un li avajtunelune, yu'un me junuc cristiano mu'yuc boch'o tuc' yo'nton ta atojol.

³ Chisnutsicun li cajcontrataque, tsc'an chisyalesicun o ta lum; tsc'anic ti ac'o naclicun ta ic'al osil jech chac c'u cha'al animaetique.

⁴ Chilaj xa ta at-o'nton chca'ay; xlaj xtu'p xa li co'ntone.

⁵ Ta to jna' ti c'u xi'elan ta vo'onee; ta jnopilan scotol c'u x'elan li avabtel apasoje.

⁶ Ta jbech jc'ob ta atojol; taquin co'nton ta atojol jech chac c'u cha'al banamil ti toj taquine.

⁷ Muc'ul Dios, tac'bun ta ora no'ox li jc'ope, yu'un ch-alub xa li co'ntone. Mu me xanac' asat ta jtojol; mu me xic'ot jech chac c'u cha'al li boch'otic chich'ic xa muquele.

⁸ Ac'bun ca'ay ta jujun sob c'u x'elan li c'uxubinel avu'une, yu'un jpatoj co'nton o ta atojol; ac'bun jna' lec bu beal xu' chixanov batel, yu'un cac'oj o co'nton ta atojol.

⁹ Muc'ul Dios, coltaun me ta sventa li cajcontrataque, yu'un vo'ot no'ox ta atojol ta jsa' li coltaele.

¹⁰ Chanubtasun ta spasel li c'usi tsc'an avo'ntone, yu'un vo'ot Diosot cu'un; ja' ac'o yic'un batel ta tuq'uil be li lequil jtojobtasel avu'une.

¹¹ Muc'ul Dios, vo'ot no'ox ta aventa ac'o cuxuc lec banamil chca'ay; loq'uesun ta sventa li jvocole, yu'un toj tuc' avo'nton.

¹² Lajesbun sc'oplal li cajcontrataque, yu'un toj ep c'uxubinel avu'un; tsalbun scotol li boch'otic xti'et yo'ntonic ta jtojole, yu'un vu'un avajtunelun.