Salmos 141 - Bible in Tzotzil de Chenalhó with Deuterocanon

Li Davide la sc'opan Dios yu'un mu me spas c'usi chopol

Q'ueoj yu'un David

¹ Muc'ul Dios, vo'ot no'ox ta jc'anbot vocol ta atojol; la' ta ora, coltaun me; a'ibun jc'op ti c'alal ta jc'opanote.

² Ac'o muyuc c'alal ta atojol li jc'ope, muetuc no'ox jech chac c'u cha'al c'alal chich' chiq'uel pom. Li jc'ob jtoyoj ta atojole jech ac'o c'otuc jech chac c'u cha'al amoton chich' milel ta jujun mal c'ac'ale.

³ Muc'ul Dios, ac'bun tal boch'o chchabibun li quee; chabibiluc lec li c'usi chloc' ta quee.

⁴ Loq'uesbun ta co'nton li c'usi chopol ta jnope, xchi'uc li c'usi chopol ta jpase. Mu me co'oluc jpas c'usi chopol jchi'uc li boch'otic chopolique; mu me xbat jchi'in ta ve'el ta sq'uinic li boch'otic chopol c'usi tspasique.

⁵ Ac'o yac'bun nucul li boch'o tuc' yo'ntone yu'un ja' jun coltael. Me chiyutune, ja' jun c'uxubinel chca'ay; ja' jech chc'ot cu'un jech chac c'u cha'al muil poxil, mu'yuc bu tsoc jol o. Te ono'ox ta jc'opan o Dios sventa ta jcontrain c'usitic chopol tspasic li boch'otic chopolique.

⁶ Li banquilaletic yu'unic li boch'otic chopolique ac'o yich'ic jipel yalel ta ch'entic; te tsna'ic ti ja' melel c'usi laj cale.

⁷ Li sbaquilique te no'ox tanpuc ac'o batuc ta yavil animaetic; jech ac'o comuc jech chac c'u cha'al c'usitic tsc'as ti biq'uitic chlilije.

⁸ Cajval, Muc'ul Dios, li vu'une ja' no'ox te oy o jsat ta atojol; vo'ot no'ox nabalun o ta atojol, mu me xacomtsanun.

⁹ Chabiun me ta sventa li boch'otic tsc'an chistsaquicune; chabiun me ta sventa syoquic li boch'otic chopolique.

¹⁰ Ja' te ac'o ochuc ta syoc stuquic; li vu'une xu' chijelov o batel.