Salmos 140 - Bible in Tzotzil de Chenalhó with Deuterocanon

Sc'anel chabiel ta stojol Dios

Q'ueoj yu'un David; ja' la sventain li banquilal yu'un jq'ueojetique.

¹ Muc'ul Dios, coltaun ta sventa li chopol cristianoetique; chabiun ta sventa li j'uts'intavanejetique.

² Yu'un ep c'usi chopol tsnop ta yo'ntonic; scotol c'ac'al puru sa' c'op tsc'anic.

³ Jayuben xa lec yoc' xchi'uquic jech chac c'u cha'al jti'val chonetic; oy veneno ta yeic jech chac c'u cha'al orachon.

⁴ Muc'ul Dios, chabiun me ta sventa li chopol cristianoetique; chabiun me ta sventa li j'uts'intavanejetique, yu'un ep c'usi chchapanic sventa ac'o yalcun ta lum yu'unic.

⁵ Li jtoybaetic le'e tsc'an chisyaquicun ta mucul yalojic; la xlich'an yoc' xch'ojonic ta jbe, yu'un tsc'an chistsaquicun.

⁶ Jech laj calbe li Muc'ul Diose: “Vo'ot Diosot cu'un, a'ibun me li jc'op ti xivocolet ta atojole.

⁷ Muc'ul Dios, Cajval, muc'ul jcoltavanej cu'un, vo'ot laj amacbun jol ti c'alal oyun ta yorail muc'ta c'ope”, xcut.

⁸ Muc'ul Dios, mu me xavac'be spas c'usi oy ta yo'nton li boch'otic chopolique; mu me xavac' ti lec chbat yu'unic scotol li c'usi ta xchapanique, yu'un jech mu stoy sbaic.

⁹ Yu'un tal-bat no'ox smaquicun ta jujujot; ac'o joybijuc ta sba stuquic li c'usi chopol chalique.

¹⁰ Ac'o yaluc ta sba stuquic li ac'al ti lec tsanajtique; ac'o balch'ujicuc ochel ta natil pozo ti bu mu xa xu' chloq'uic o tale.

¹¹ Li boch'otic tsoquesvan xchi'uc yeique mu me xjalijic li' ta banamil; li j'uts'intavanejetique ja' ac'o c'otuc ta stojolic li c'usitic chopole, yu'un jech ac'o soquicuc ta ora no'ox.

¹² Li Muc'ul Diose jna'oj ti tspoj li boch'o chich' vocole, xchi'uc ti tscolta li boch'o abul sbae.

¹³ Li boch'otic tuc' yo'ntonique chalic alequilal; li boch'otic tuc' c'usi tspasique te chnaquiic o ta atojol.