Salmos 14 - Bible in Tzotzil de Chenalhó with Deuterocanon

Scotol cristiano mu'yuc Dios ta yo'ntonic

Q'ueoj yu'un David; ja' la sventain li banquilal yu'un jq'ueojetique.

¹ Li boch'otic bolique jech tsnopic: “Mu'yuc Dios”, xiic. Yu'un vovijem xa sjolic o, bats'i chopol c'usitic tspasic; me junuc mu'yuc boch'o lec c'usi tspas.

² Scotol cristianoetic q'uelbilic tal yu'un Muc'ul Dios c'alal ta vinajel; tsq'uel yil me oy boch'o cha'ibe smelol, tsq'uel me oy boch'o tsc'an tsa' li Diose.

³ Pero scotolic ch'ayemic ta be, scotol boliben yo'ntonic; mu'yuc boch'o lec c'usi tspas, solel mu junuc o ta j'ech'el.

⁴ Mu xa'ibeic o smelol li boch'otic chopol c'usi tspasique. Ja' tsti'ic ya'yel li steclumal Diose; tstsaquic jech chac c'u cha'al tstsac pan sve'ic. Mu'yuc ta yo'nton tsc'anbeic vocol li Muc'ul Diose.

^5-6 Ja' no'ox tsna'leic c'usi tsc'anic li boch'o mu'yuc stu chilique; ja' yu'un tsacbilic o yu'un xi'el cha'yic. Yu'un ja' no'ox chi'inbilic yu'un Dios li boch'o chch'unbeic c'usitic tsc'ane; ja' chabibilic o yu'un Muc'ul Dios li boch'o mu'yuc stu ch-ilatique.

⁷ Oyuc c'uxi xtal coltael ta stojol te ta vits Sión li Israele. C'alal chac'be slequilal steclumal li Muc'ul Diose, toj xcuxet no'ox yo'nton li smomnich'nab Jacobe, ja' li jun ta lum israeletique.