Salmos 139 - Bible in Tzotzil de Chenalhó with Deuterocanon

Scotol yiloj, scotol sna'oj stuc li Diose

Q'ueoj yu'un David; ja' la sventain li banquilal yu'un jq'ueojetique.

¹ Muc'ul Dios, vo'ot laj aq'uel lec c'u xi'elan, xchi'uc lec xavotquinun.

² Vo'ot xavotquinun c'alal chichoti, xchi'uc c'alal chiva'i aq'ueloj tal ta nom scotol li c'usitic ta jnope.

³ Chajal ta aba ta asat scotol c'u xi'elan bu chixanov xchi'uc c'alal ta jcux co'nton. Xavotquin scotol li c'usitic ta jpase.

⁴ Ac'o me mu'yuc to'ox chloc' ta que li c'usi chcale, pero li vo'ote, Muc'ul Dios, avotquinoj xa ono'ox.

⁵ Ajoyibtaojun lec ta jujujot; amacojun lec ta yut ac'ob.

⁶ Solel labal chca'ay ti c'u x'elan ana'oj scotole; yu'un toj ech'em abijil, mu xa xca'ibe o smelol c'u x'elan.

⁷ ¿Bu xu' chibat ti jech mu xa xavilune? ¿Bu chijatov batel ti jech nom xa oyun ta atojole?

⁸ Me chimuy batel ta yutil to vinajele, te ono'ox oyot; me chiyal batel ta yutil to banamile, te oyot noxtoc.

⁹ Me chivil batel c'alal ta sloq'uem c'ac'ale, me chibat c'alal ta smaleb c'ac'ale,

¹⁰ oyun ono'ox ta ac'ob; atsacojun ono'ox ta abats'ic'ob.

¹¹ Ac'o me ta jnop ti xu' chisnac'un li ic' osile, ac'o me chc'ataj ta ac'ubaltic li sac osil bu oyune,

¹² pero li ic' osile mu'yuc ic' chavil li vo'ote. Li ac'ubaltique lec sac chavil jech chac c'u cha'al c'ac'altic; co'ol chavil li ic' osile xchi'uc li sac osile.

¹³ Yu'un vo'ot laj apas scotol c'u x'elan oy li jbec'tale; vo'ot laj achapanun tal ta yut xch'ut li jme'e.

¹⁴ Ta xcal alequilal, yu'un xch'ay co'nton chca'ay, yu'un toj labal sba ti c'u x'elan apasojune; jna'oj lec ta co'nton ti vo'ot avabtelune.

¹⁵ Mu'yuc mucul ta asat c'u x'elan ichapaj tal li jbec'tale, xchi'uc ti c'u x'elan lic chi'inatcun tal ti mu'yuc boch'o xu' chile, xchi'uc ti c'u x'elan lic ayincun tal li' ta banamile.

¹⁶ Aviloj c'u x'elan ilic nabuc tal li jbec'tale; chapal ono'ox avu'un ti c'u yepal c'ac'al chicuxie; tsacal ta vun avu'un scotol ti c'alal mu'yuc to'ox chc'ot ta pasele.

¹⁷ Dios cu'un, toj yan yutsil chca'ay li c'usi anopoje; toj muc' ta jyalel, mu xlaj ta alel c'u x'elan.

¹⁸ Me ta xcat c'u yepale, xjelov to jech yepal chc'ot jech chac c'u cha'al yi' ta ti'nab; ti c'u x'elan xu' chlaj ta atel cu'une, tsc'an cuxulun o ta atojol sbatel osil.

¹⁹ Dios cu'un, vo'ot chavac' chamuc li boch'otic chopolique; voc'bun loq'uel ta jtojol li jmilvanejetique.

²⁰ Yu'un ep ta xchopolc'opojic ta atojol; altic no'ox ta xixtanic ta alel abi li avajcontrataque.

²¹ Muc'ul Dios, li boch'otic chopol chayilicote, chopol chquilic ec; li boch'otic chasbajicote ta jbajic ec.

²² Chopol chquilic o ta j'ech'el; contra chquilic o.

²³ Q'uelun lec avil c'u xi'elan, Dios cu'un; otquino lec li c'usi oy ta co'ntone; q'uelbun avil c'u x'elan co'nton, otquino lec avil li c'usitic ta jnope.

²⁴ Q'uelavil me oy c'usi chopol ta co'ntone; tuq'uibtasun batel ta be sventa sbatel osil.