Salmos 138 - Bible in Tzotzil de Chenalhó with Deuterocanon

La stojbeic ta vocol Dios ta sventa ti icoltaatique

Q'ueoj yu'un David.

¹ Ta jtojbot ta vocol ta scotol co'nton; ta jq'uejinta alequilal ta stojol li yantic diosetique.

² Ta jquejan jba ta stuq'uil li ach'ulnae; ta xcal alequilal ta sventa ti toj ep c'uxubinel avu'une, xchi'uc ta sventa ti mu xana' xajelilan o atalele, yu'un laj avac' ich'atuc ta muc' li abie xchi'uc li c'usi avaloje. Mu'yuc c'usi yan ti jech ich'bil ta muq'ue.

³ C'alal xivocolet ta atojole, laj atac'bun li jc'ope; laj avac'bun lec stsatsal co'nton yan velta.

⁴ Scotol li ajvaliletic ta banamile ta xalic alequilal, yu'un cha'yic ti toj lec c'usitic avaloje.

⁵ Ta sq'uejintaic scotol ti c'u x'elan atalele, yu'un toj ech'em li avutsilal alequilale.

⁶ Ac'o me toj ech'em amuc'ul, vo'ot li Muc'ul Diosote, pero oy ta avo'nton li boch'o biq'uit ch-ilatique; yan li jtoybaetique chaq'uel tal ta nom li c'usi tspasique.

⁷ C'alal ta jta tsots jvocole, li vo'ote mu xavac' chamcun; chavac' tal avu'el, jech colem chicom ta sventa li cajcontra ti ch-ilinic ta jtojole.

⁸ Yu'un chats'acubtas scotol c'usi oy ta avo'nton sventa chacoltaun, yu'un li vo'ote Muc'ul Dios, sbatel osil atalel chac'uxubinvan o; mu me xaquechan li avabtel chapase.