Salmos 137 - Bible in Tzotzil de Chenalhó with Deuterocanon

La sna' c'u to'ox x'elan svocolic te ta Babilonia

¹ Te lichoticutic ta sti' uc'umetic ta Babilonia; te lic japucutic oq'uel ta scoj ti it'ab ta co'ntoncutic li Sione.

² Li arpaetic cu'uncutique te bat joc'ancutic comel ta sauce-te'etic.

³ Li boch'otic la xchucuncutic batele la sc'anic ti ac'o q'uejincuncutique. Li boch'otic laj yac' jvocolcutique la sc'anic ti ac'o oyuc xcuxetel co'ntoncutique, ti ac'o jq'uejintabecutic jcojuc li q'ueoj sventa Sione.

⁴ ¿Me xu' ta jq'uejintabe sq'ueoj Muc'ul Dios ta yosilal li yanlum cristianoetique?

⁵ Yan me chach'ay ta co'nton li vo'ote, Jerusalén, mu'yuc stu ac'o comuc o li jbats'ic'obe.

⁶ Me mu'yuc xa chajna'ot oe, me mu'yuc xa tsots ac'oplal chca'aye, me xcuxet xa no'ox co'nton ti bu oyune, ac'o spac' sba o ta jpac'o li coq'ue.

⁷ Muc'ul Dios, na'o me c'u x'elan yo'ntonic li edometic ti c'alal ja'o oy svocol li Jerusalene, jech laj yalic: “Jinesic o, j'ech'el jinesic o c'alal ta snacleb”, xiic.

⁸ ¡Vo'ot Babilonia, ta to xavich' jinesel! Coliyal li boch'o chayac'bot atojol ta sventa li c'usi laj apasbuncutique.

⁹ Coliyal li boch'o ta stsac li ololetic avu'un ti ta snet' lec ta tone.