Salmos 136 - Bible in Tzotzil de Chenalhó with Deuterocanon

Toj ep la xc'uxubin steclumal li Muc'ul Diose

¹ Tojbeic ta vocol li Muc'ul Diose, yu'un ja' toj lec yo'nton, yu'un sbatel osil mu xlaj o li c'uxubinel yu'une.

² Tojbeic ta vocol li Muc'ul Dios yu'un yantic diosetique, yu'un sbatel osil mu xlaj o li c'uxubinel yu'une.

³ Tojbeic ta vocol li Muc'ul Ajvalil yu'un scotol ajvaliletique, yu'un sbatel osil mu xlaj o li c'uxubinel yu'une.

⁴ Ja' no'ox stuc xu' yu'un tspas muc'tic sq'uelubiltac, yu'un sbatel osil mu xlaj o li c'uxubinel yu'une.

⁵ Ja' la spas ta sventa sbijil li vinajele, yu'un sbatel osil mu xlaj o li c'uxubinel yu'une.

⁶ Ja' la sq'ui batel ta ba vo'etic li banamile, yu'un sbatel osil mu xlaj o li c'uxubinel yu'une.

⁷ Ja' la spas li c'usi muc'tic chac' xojobale, yu'un sbatel osil mu xlaj o li c'uxubinel yu'une.

⁸ Ja' la spas li c'ac'al sventa chac' xojobal ta c'ac'altique, yu'un sbatel osil mu xlaj o li c'uxubinel yu'une.

⁹ Ja' la spas noxtoc li u xchi'uc c'analetic sventa chac' xojobal ta ac'ubaltique, yu'un sbatel osil mu xlaj o li c'uxubinel yu'une.

¹⁰ Ja' la smilbe sba yol xnich'onic noxtoc li egiptoetique, yu'un sbatel osil mu xlaj o li c'uxubinel yu'une.

¹¹ Ja' la sloq'ues tal ta stojol egiptoetic li israeletique, yu'un sbatel osil mu xlaj o li c'uxubinel yu'une.

¹² Ta svu'el, ta stsatsal la sloq'ues tal, yu'un sbatel osil mu xlaj o li c'uxubinel yu'une.

¹³ Ja' la svoc' ta o'lol noxtoc li Tsajal Nabe, yu'un sbatel osil mu xlaj o li c'uxubinel yu'une.

¹⁴ Ja' te laj yac' jelovicuc tal scotol israeletic ta o'lol nab, yu'un sbatel osil mu xlaj o li c'uxubinel yu'une.

¹⁵ Ja' la smes batel ta nab li Faraón xchi'uc scotol yajsoldadotaque, yu'un sbatel osil mu xlaj o li c'uxubinel yu'une.

¹⁶ Ja' la stojobtas batel ta xocol banamil li steclumale, yu'un sbatel osil mu xlaj o li c'uxubinel yu'une.

¹⁷ Ja' laj yac' chamicuc li muc'tic ajvaliletique, yu'un sbatel osil mu xlaj o li c'uxubinel yu'une.

¹⁸ Ja' la smil li ajvaliletic ti ech'em xu' yu'unique, yu'un sbatel osil mu xlaj o li c'uxubinel yu'une.

¹⁹ Ja' la smil li Sehón, ajvalil yu'un amorretique, yu'un sbatel osil mu xlaj o li c'uxubinel yu'une.

²⁰ Ja' la smil noxtoc li Og, ajvalil ta Basane, yu'un sbatel osil mu xlaj o li c'uxubinel yu'une.

²¹ Ja' laj yac'be ta yan li yosilalique, yu'un sbatel osil mu xlaj o li c'uxubinel yu'une.

²² Ja' laj yac'be yich' li Israele, ja' li yajtunele, yu'un sbatel osil mu xlaj o li c'uxubinel yu'une.

²³ Ja' ti la sna'utic c'alal toj ep chquich'tic vocole, yu'un sbatel osil mu xlaj o li c'uxubinel yu'une.

²⁴ Ja' ti la scoltautic loq'uel ta sc'ob cajcontratique, yu'un sbatel osil mu xlaj o li c'uxubinel yu'une.

²⁵ Ja' tsmac'lin noxtoc scotol li c'usitic cuxajtique, yu'un sbatel osil mu xlaj o li c'uxubinel yu'une.

²⁶ Ja' lec tojbeic ta vocol Dios ti te oy ta vinajele, yu'un sbatel osil mu xlaj o li c'uxubinel yu'une.