Salmos 133 - Bible in Tzotzil de Chenalhó with Deuterocanon

Toj jun yutsil ti c'alal lec jc'anoj jbatique

Q'ueoj yu'un David sventa jpasq'uinetic chmuyic batel ta Jerusalén.

¹ Q'uelavilic, toj lec, toj jun yutsil c'alal lec co'ol co'ntontic ti cuts' calal jbatique.

² Ja' jech yutsil jech chac c'u cha'al aceite ti laj yich' ac'bel ta sjol li Aarone ti iyal batel c'alal ta yisime, ti ic'ot c'alal ta snuc' sc'u'e.

³ Ja' jech noxtoc jech chac c'u cha'al sjob osil ta Hermón ti chyal batel ta sba li vitsetic ta Sione, yu'un li Muc'ul Diose ja' te chac' batel lec bendición xchi'uc cuxlejal sventa sbatel osil.