Salmos 132 - Bible in Tzotzil de Chenalhó with Deuterocanon

Li Diose ja' la st'uj lum Jerusalén sventa te chich' pasbel xch'ulna

¹ Muc'ul Dios, na'o me li Davide xchi'uc scotol ti c'u yepal vocol laj yich'e;

² na'o me li c'usi jamal laj yal ta atojol, vo'ot li Muc'ul Diosot yu'un Jacobe, jech laj yal:

³ “Mu'yuc bu chi'och o ta yut jna; mu'yuc bu chivay o ta jvayab.

⁴ Mu'yuc bu ta xquic' jutuc jvayel; mu'yuc bu ta jmuts' o jsat

⁵ ja' to me la jtabot lec ana, vo'ot li Muc'ul Diosote, ja' to me la jtabot lec avavil, vo'ot li Diosot yu'un Jacob ti ech'em atsatsale”, xi.

⁶ Laj ca'itic ti te oy ta Efrata li xcaxail smantal Diose; te la jtatic ta yosilal Jaar.

⁷ Ochcutic batel ta ch'ulna yu'un; jquejan jbatic ta stuq'uil stec'um yacan.

⁸ Muc'ul Dios, la' me, la' ochan li' ta xcuxubil avo'ntone; la' achi'uc li acaxae, ja' li senyail avu'ele.

⁹ Li paleetic avu'une ja' ac'o slapic li alequil atuq'uile; li avu'untaque cuxetuc no'ox yo'ntonic.

¹⁰ Ta sventa ti lec ac'anoj li avajtunel Davide, mu me xajip ta avo'nton li ajvalil li' at'ujoje.

¹¹ Li Muc'ul Diose oy c'usi jamal laj yalbe li Davide; le'e mu xlaj sc'oplal o, jech laj yalbe: “Ja' ta xcac' chotiuc o ta achotleb sventa ajvalilal li amomnich'nabe.

¹² Me chch'unbicun c'usi jchapanoj li anich'nabe, me ja' tspasic o batel li chanubtasel cu'une, j'ech'el ta xcac' chotiicuc o ta achotleb noxtoc li smomnich'nabique”, xut.

¹³ Li Muc'ul Diose ja' la st'uj li vits Sione; ja' la st'uj sventa te chnaqui o.

¹⁴ Jech yaloj: “Li'i, ja' xcuxubil jol co'nton chcom o; ja' li' chinaqui o, yu'un jech la sc'an co'nton.

¹⁵ Ta xcac'be ep bendición li c'usitic chtun yu'unic li'i; ta xcac'be lec sve'elic li me'onetic yu'unique.

¹⁶ Li paleetic yu'unique ja' chcac'be slapic li coltael cu'une. Li boch'otic tuc' yo'ntonique chcac' avanicuc ta xcuxetel yo'ntonic.

¹⁷ Ta xcac' ts'acbatuc yabtel yu'un smomnich'nab li Davide; te tsanal o cu'un li luz sventa ajvalil jt'ujoje.

¹⁸ Ta xcac' yalicuc o ta q'uexlal li yajcontrataque; yan li stuque ta xcac' xojobanuc o li scoronae”, xi.