Salmos 130 - Bible in Tzotzil de Chenalhó with Deuterocanon

Tsc'an ja' no'ox ta jpat co'ntontic o yu'un li Muc'ul Diose

Q'ueoj sventa jpasq'uinetic chmuyic batel ta Jerusalén.

¹ Muc'ul Dios, oyun ta tsots vocol ti xivocolet ta atojole.

² Cajval, a'ibun li jc'ope; ts'e'ano achiquin ti xi'avet ta sc'anel vocol ta atojole.

³ Muc'ul Dios, ti tauc xavac' ta aventa li jmulcutique, ¿boch'o xu' lec va'al chcom ta atojol ti jechuque?

⁴ Pero li vo'ote chach'ay ta avo'nton li jmulcutique, yu'un jech ac'o ich'atan ta muc'.

⁵ Scotol jol co'nton ta jmala chiscoltaun li Muc'ul Diose. Ja' jpatoj co'nton yu'un li sc'ope.

⁶ Ja' tete jsat ta smalael chiscoltaun li Muc'ul Diose, jech chac c'u cha'al jchabilum ti smala-mala tsacube, jech chac c'u cha'al jchabilum ti chac sacubuc ya'ay ta orae.

⁷ Ja' me jech xamalaic chascoltaoxuc Muc'ul Dios, vo'oxuc israeletic, yu'un ta melel chataic c'uxubinel yu'un; lec ts'acal coltael chayac'boxuc.

⁸ Ja' jtoj mulil chc'ot avu'unic, vo'oxuc li israeloxuque.