Salmos 129 - Bible in Tzotzil de Chenalhó with Deuterocanon

Ja' jcoltavanej stuc li Muc'ul Diose

Q'ueoj sventa jpasq'uinetic chmuyic batel ta Jerusalén.

¹ Ta jqueremal ono'ox toj ep boch'o laj yac'bicun tsots jvocol. Israeletic, jech xavalic acotolic:

² Ta jqueremal ono'ox toj ep boch'o laj yac'bicun tsots jvocol, pero mu'yuc ono'ox c'uxi laj yuticun.

³ Puru nucul laj yac'bicun ta jpat; ch'enajtic to icom yu'unic jech chac c'u cha'al boch'o tsloc banamil ta arado.

⁴ Pero li Muc'ul Diose tuc' yo'nton, ja' la xtuch'be xch'ojonic li j'uts'intavanejetique.

⁵ Ac'o yalicuc ta q'uexlal, ac'o suticuc batel ta spatic scotol yajcontra li Sione.

⁶ Ac'o taquijicuc jech chac c'u cha'al ts'i'lal chch'i ta ba na ti chtaquij c'alal mu to tsta xch'iele,

⁷ ti mu'yuc c'usi stu oe, ti mu'yuc bu chich' chuquel lec ta jujuchuc jech chac c'u cha'al trigoe.

⁸ Jech noxtoc ac'o mu'yucuc jech ch-albatic yu'un li boch'otic te chjelovique: “Ac'o yac'bot bendición li Muc'ul Diose, jech ta jc'ancutic bendición ta atojol ec li vu'uncutique”, mu me xiuc sc'oplalic.