Salmos 127 - Bible in Tzotzil de Chenalhó with Deuterocanon

Ja' te chlic tal ta stojol Dios scotol li c'usi ta jtatique

Q'ueoj yu'un Salomón sventa jpasq'uinetic chmuyic batel ta Jerusalén.

¹ Me mu xiscoltautic ta spasel jbej na li Muc'ul Diose, altic chac' svocolic li j'abteletique. Me mu ja'uc Muc'ul Dios chchabi li lume, altic te va'ajtic o ta xchabiel li jchabilumetique.

² Altic chac' svocolic ti sob chliquic ta abtele, ti ta mal to c'ac'al chcux yo'ntonique, ti vocol xa tstaic jun vaj sve'ique. Li boch'otic lec c'anbilic yu'un Diose jun yo'nton chvayic.

³ Li col jnich'ontic chijyac'butic Muc'ul Diose ja' jc'ulejaltic, ja' jun muc' bendición chquich'tic.

⁴ Li col jnich'ontic chvoq'uic c'alal querem tsebutic toe ja' jech chac c'u cha'al jun soldado ti ep flechaetic stsacoj ta sc'obe.

⁵ Xcuxet no'ox yo'nton li vinic ti oy epal flechaetic ta sc'obe; mu tsalbiluc chcom yu'un yajcontratac ti c'alal chich' chapanele.