Salmos 124 - Bible in Tzotzil de Chenalhó with Deuterocanon

Ja' xu' yu'un chiscoltautic li Muc'ul Diose

Q'ueoj yu'un David sventa jpasq'uinetic chmuyic batel ta Jerusalén.

¹ Israeletic, jech xavalic: —Ti manchuc xchi'inojutic li Muc'ul Diose,

^2-3 ti manchuc li' oy ta jtojoltique, mu'yuc c'usi xu' cu'untic ti jechuque. C'alal ital scontrainutic li cristianoetique, c'alal ilic sc'ac'al yo'ntonic ta jtojoltique, cuxul la sbic'utic batel ti jechuque.

⁴ La xcuchutic batel stsatsal yoc uc'um, xchi'uc li' ijelov ta jtojoltic li nojelal uc'um ti jechuque.

⁵ Ech' xcuchutic xchi'uc yip ti jechuque —chianic.

⁶ Bats'i coliyalbutic li Muc'ul Dios ti muc xac' biq'uitic la slilinutic ta yeique.

⁷ Lijatovutic to loq'uel jech chac c'u cha'al mut ti chjatov batel c'alal yu'un xa chmilate; ituch' yaq'uil li syoquique, jech lijcol loq'uel.

⁸ Li coltael la jtatique ja' ta sventa li Muc'ul Diose, ja' li boch'o la spas vinajel xchi'uc banamile.