Salmos 121 - Bible in Tzotzil de Chenalhó with Deuterocanon

Ja' jchabivanej cu'untic li Muc'ul Diose

Q'ueoj sventa jpasq'uinetic chmuyic batel ta Jerusalén.

¹ C'alal ta jtoy muyel jsat ta vitstique, jech chcal ta co'nton: “¿Bu ta xlic tal li jcoltaele?”, xichi.

² Li jcoltaele te ta xlic tal ta stojol li Muc'ul Diose, ja' ti la spas vinajel banamile.

³ Mu xac' batuc avacan ti bu bilile; mu sna' xvay li boch'o chaxchabiote.

⁴ Mu sna' xnicubaj, me jutuc mu sna' xtal svayel o li jchabivanej yu'un Israele.

⁵ Li Muc'ul Diose ja' jchabivanej avu'un; li Muc'ul Diose ja' chasmacot ta xyaxinal, te oy o ta abats'ic'ob.

⁶ Li c'ac'ale mu'yuc c'usi chopol xu' chaspasbot ta c'ac'altic; li ue mu'yuc c'usi chopol chaspasbot ta ac'ubaltic.

⁷ Li Muc'ul Diose ja' chaxchabiot ta sventa scotol c'usi chopol, ja' xchabioj ach'ulel.

⁸ Ja' chaxchabiot c'alal chaloc', c'alal cha'och; xchabiojot li' ta ora xchi'uc c'alal to ta sbatel osil.