Salmos 120 - Bible in Tzotzil de Chenalhó with Deuterocanon

Sc'oplal c'usi tstaic li j'epalc'opetique

Q'ueoj sventa jpasq'uinetic chmuyic batel ta Jerusalén.

¹ C'alal toj tsots jvocole, xivocolet ta stojol li Muc'ul Diose, pero chistac'bun ono'ox li jc'ope.

² Muc'ul Dios, coltaun me ta sventa li j'epalc'opetique xchi'uc ta sventa li jlo'lavanejetique.

³ J'epalc'op, ¿c'usi atojol chavich', c'usi chata, vo'ot ti chalo'lavan achi'uc avoq'ue?

⁴ Ja' atojol li flecha ti lec ts'ubts'ub sni' tstunesic jpasc'opetique xchi'uc li tsanajtic yac'alil enebro te'e.

⁵ Toj abul jba ti li' nacalun ta Mesec jech chac c'u cha'al yanlume, ti li' jpasoj jcarpana yo' bu scarpanaic li jnaclumetic ta Quedare.

⁶ Toj ep xa c'ac'al li' nacalun jchi'uc li boch'otic mu sc'an sta jun yo'ntonique.

⁷ C'alal chcalbeic sc'oplal li jun co'ntontique, li stuquique pleito no'ox tsc'anic o.