Salmos 12 - Bible in Tzotzil de Chenalhó with Deuterocanon

Sc'opanel Dios sventa ta jc'antic coltael

Q'ueoj yu'un David. La sq'uejintaic ta arpa ti yich'oj vaxquib yaq'uile; Ja' la sventain li banquilal yu'un jq'ueojetic.

¹ Muc'ul Dios, coltauncutic me, yu'un mu'yuc xa boch'o jun yo'ntonic ta atojol; chtu'p xa batel li boch'otic tuc' yo'ntonique.

² Puru epalc'op chalbe xchi'ilic; toj lec ya'yel li c'usi chloc' ta yeique, pero oy chib smelol yu'unic.

³ Muc'ul Dios, c'ocbo loq'uel yoq'uic li boch'otic chlo'lavanic ta sventa c'usi chalique, ti ja' no'ox tstoy sbaique,

⁴ ti jech chalique: “Lec xu' cu'untic o ti oy quetique, xu' cu'untic ta jpoj jbatic o jchi'uctic li coc'tique; mu'yuc boch'o xu' muc' chac' sba, yu'un chtal yalbutic mantal”, ti xiique.

⁵ Li Muc'ul Diose jech chal: “Ta sventa ti toj uts'intabil li me'onetique, ta sventa ti toj c'ux svocol li boch'o mu'yuc stu ch-ilatique, ja' yu'un ta xibat, chbat cac'be li coltael tsc'anique”, xi.

⁶ Li c'usi yaloj Muc'ul Diose, bats'i sac ta jyalel, jech chac c'u cha'al saquil taq'uin ti lecubtasbil ta hornoe, ti ts'acal lec vucub velta chic'bil ta horno li yic'ubale.

⁷ Vo'ote, Muc'ul Dios, achabiojuncutic o; scotol ora chapojuncutic c'alal chiyuts'intauncutic li boch'o chopol yo'ntonique.

⁸ Yu'un li boch'o chopolique buyuc no'ox chanovic; scotol cristianoetic lec chilic li c'usi chopole.