Salmos 119 - Bible in Tzotzil de Chenalhó with Deuterocanon

Toj lec chtojobtasvan li mantaletic yu'un Diose Alef

Alef

¹ Xcuxet no'ox yo'ntonic li boch'otic tuc' c'usitic tspasique, ti ja' no'ox tspasilanic o c'usi chal li smantaltac Muc'ul Diose.

² Xcuxet no'ox yo'ntonic li boch'otic tsc'an cha'ibeic smantaltac Muc'ul Diose, ti scotol yo'ntonic ta sa'ilanique,

³ ti mu sc'an spasic c'usitic chopole, ti ja' no'ox te chanovic o ta sbe li Muc'ul Diose.

⁴ Li vo'ote Muc'ul Dios, avaloj mantal ti tsots sc'oplal ac'o yich' ch'unel li mantaletic avu'une.

⁵ Co'ntonuc ti oyuc c'uxi c'otuc ta pasel cu'une, ti ch'unuc cu'un li mantaletic avu'une.

⁶ Jech mu'yuc chiq'uexov c'alal me ja' ta jnopilan scotol c'usi chal li mantaletic avu'une.

⁷ Me ichan cu'un li c'usitic tuc' avaloje, ta xcal alequilal ta sjunul co'nton.

⁸ Ta jc'an ta jch'un o li amantaltaque; mu me xacomtsanun.

Bet

Bet

⁹ ¿C'u x'elan xu' lec tuc' chcuxiic li boch'otic ja' to chch'iique? Ja' no'ox me ta xch'unic lec li ac'ope.

¹⁰ Scotol co'nton chajsa'ot; mu me xavac' xcom xch'unel cu'un li mantaletic avu'une.

¹¹ La jchabi ta co'nton li ac'ope, yu'un jech mu jta jmul ta atojol.

¹² Muc'ul Dios, toj jun no'ox avutsil li vo'ote; chanubtasun me ta xch'unel li mantaletic avu'une.

¹³ Li quee chalilan batel scotol li tuq'uil mantaletic loq'uem ta avee.

¹⁴ Toj xcuxet no'ox co'nton c'alal ta jch'un li mantaletic avu'une; ja' toj xcuxet chca'ay, ja' mu sta jech ti c'alal oy ep jc'ulejale.

¹⁵ Ja' ta jnopilan o li mantaletic avu'une; ja' ta jna'ilan o li c'usitic chac'ane.

¹⁶ Xcuxet no'ox co'nton yu'un li c'usitic avaloje; mu xch'ay o ta co'nton li ac'ope.

Guímel

Guímel

¹⁷ C'uxubinun, vu'un li avajtunelune, ac'o to cuxicun, jech xu' ta jch'un li ac'ope.

¹⁸ Jambun lec jsat, yu'un ac'o quil lec ti jun no'ox yutsil li amantaltaque.

¹⁹ Yanlum no'ox c'otemun li' ta banamile; mu me xanac'bun ta jtojol li mantaletic avu'une.

²⁰ Scotol ora ja' nabal o co'nton yu'un li chanubtaseletic avu'une, yu'un oy ta co'nton ta jc'an chcotquin scotol.

²¹ Vo'ot chataq'ui li jtoybaetique xchi'uc li boch'otic chopol yo'ntonique, ti tscomtsanic xch'unel li mantaletic avu'une.

²² Loq'uesbun ta jtojol li chopolc'optael, li na'leel chiyac'bicune, yu'un ja' jch'unoj li chanubtasel avu'une.

²³ Li banquilaletique la xchotan sbaic lec sventa chchopolc'opojic ta jtojol, pero vu'un li avajtunelune ja' no'ox ta jnopilan o li mantaletic avu'une.

²⁴ Ja' muiben o xca'ay snopel li chanubtaseletic avu'une, yu'un ja' jtojobtasvanej c'otem cu'un.

Dálet

Dálet

²⁵ Solel pac'alun ta pucuctic chca'ay; totsun liquel ta sventa li ac'ope.

²⁶ C'alal laj cac'bot avil li c'usitic la jpase, lec laj atac'bun; jech chanubtasun to lec ta xch'unel li chanubtaseletic avu'une.

²⁷ Ac'bun ca'ibe lec smelol c'usitic chal li mantaletic avu'une, jech xu' te ta jnopilan ti toj muc'tic c'usitic apasoje.

²⁸ Xlaj xtu'p xa co'nton yu'un li at-o'ntone; tsatsubtasun me ta sventa li ac'ope.

²⁹ Namajesbun batel ta jtojol li epalc'ope; ach'ul vocoluc, ja' ac'bun li bijubtasel avu'une.

³⁰ Ja' la jc'an li c'usitic melele; ja' cac'oj o batel ta ba'yucbe li tojobtaseletic avu'une.

³¹ Ja' te oy o co'nton ta xch'unel li amantaltaque, ja' yu'un Muc'ul Dios, mu me xavac'un ta q'uexlal.

³² Ja' cac'ojbe yipal xch'unel li amantaltaque, yu'un ja' la sjambun jol co'nton.

He

He

³³ Muc'ul Dios, bijubtasun lec ta spasel li mantaletic avu'une, yu'un jech xu' ta jpas o c'alal to ta slajeb.

³⁴ Jambun lec jol co'nton jech xu' ta jch'un li amantaltaque, jech scotol co'nton ja' ta jch'un o.

³⁵ Tuq'uibtasun batel lec ta spasel li amantaltaque, yu'un ja' te ta jta o xcuxetel co'nton.

³⁶ Ja' ac'bun ta co'nton sc'anel li mantaletic avu'une; mu me ja'uc oy ta co'nton sc'upinel li c'usi sventa no'ox banamile.

³⁷ Macbun jsat, mu me ja'uc jq'uel li c'usitic altic ti mu'yuc stue; julubtasun ta stamel batel li be avu'une.

³⁸ Vu'un li avajtunelune, ac'o c'otuc ta pasel ta jtojol c'usi avaloj ta stojol li boch'otic yich'ojicot ta muq'ue.

³⁹ Loq'uesbun ta jtojol li chopolc'optael ti xi'emun yu'une, yu'un toj lec li c'usitic chapal avu'une.

⁴⁰ Ja' oy ta co'nton o ta jch'un li mantaletic avu'une; cuxesbun lec co'nton, yu'un li vo'ote lec tuc' avo'nton.

Vau

Vau

⁴¹ Muc'ul Dios, ac'bun li c'uxubinel avu'une; ac'bun li coltael avu'un jech chac c'u cha'al avaloje.

⁴² Jech xu' cu'un ta jtac'be li boch'otic chisna'lelicune, yu'un jch'unoj ti ja' melel c'usi avaloje.

⁴³ Mu me xapojbun loq'uel ta que jliqueluc li ac'op ti ja' melele, yu'un ja' jpatoj o co'nton yu'un ti tuc' c'usitic avaloje.

⁴⁴ Ja' ta jc'an ta jch'un o li amantaltaque; j'ech'el ta jch'un o, c'alal to ta sbatel osil.

⁴⁵ Jech jun co'nton chicuxi li' ta banamil, yu'un ja' ta jch'un li tojobtaseletic avu'une.

⁴⁶ Ta xcalbe ya'ay amantaltac li ajvaliletique; mu xiq'uexov o ta yalel.

⁴⁷ Yu'un toj lec jc'anoj li mantaletic avu'une; toj xcuxet no'ox co'nton yu'un.

⁴⁸ Ta jtoy jc'ob ta atojol ta sventa li mantaletic avu'un ti lec jc'anoje; ja' ta jnopilan o c'usi chal li chanubtaseletic avu'une.

Zain

Zain

⁴⁹ Na'o me c'usi avalojbun, vu'un li avajtunelune, yu'un ja' sventa la jpat o co'nton avu'un.

⁵⁰ Ja' chismuq'uibtasbun co'nton c'alal oy ep jvocol, ja' ta sventa c'usi avalojbun ti chcux banamil chca'ye.

⁵¹ Li jtoybaetique ep ta sna'leicun, pero mu'yuc bu ta jcomtsan o xch'unel li mantaletic avu'une.

⁵² Cht'ab ta co'nton li c'usi lec tuc' achapanoj ta vo'onee, jech te chpat o co'nton, Muc'ul Dios cu'un.

⁵³ Tsots chi'ilin ta scojic li boch'otic chopol yo'ntonique, ja' li boch'otic la scomtsanic xch'unel amantaltaque.

⁵⁴ Li chanubtaseletic avu'une ja' jun lequil q'ueoj laj ca'ay li' ta banamil ti j'ech'elbe no'ox chijelove.

⁵⁵ Ta jujun ac'ubal chat'ab ta co'nton li vo'ote Muc'ul Dios, jech ta jc'an ta jpas c'usi chal li amantaltaque.

⁵⁶ Yu'un ja' jtu o ti ac'o jpas li c'usitic avaloje.

Chet

Chet

⁵⁷ Muc'ul Dios, vo'ot no'ox Diosot o cu'un, caloj ta jamal ti ta jch'unbot li ac'ope.

⁵⁸ Scotol co'nton ta jsa' coltael ta atojol, ja' yu'un c'uxubinun me jech chac c'u cha'al avaloj ono'oxe.

⁵⁹ La jnop lec li c'usi beal jtamoje, jech lisut tal, ja' tal jtam spasel li mantaletic avu'une.

⁶⁰ Laj cac' persa xch'unel li amantaltaque; mu'yuc la jmala jal.

⁶¹ La syaquicun ta ch'ojon yalojic li boch'otic chopolique, pero mu'yuc ono'ox la jch'ay ta co'nton li amantale.

⁶² Ta o'lol ac'ubal chilic, ta jtojbot ta vocol ta sventa ti toj tuc' li tojobtaseletic avu'une.

⁶³ Ja' jchi'il jbacutic jchi'uc li boch'otic yich'ojicot ta muq'ue, ti chch'unic li amantaltaque.

⁶⁴ Muc'ul Dios, li c'uxubinel avu'une nojem ta banamil; bijubtasun lec ta sventa li mantaletic avu'une.

Tet

Tet

⁶⁵ Muc'ul Dios, toj lec c'usi laj apas ta jtojol, jech chac c'u cha'al avalojbun ono'ox vu'un li avajtunelune.

⁶⁶ Chanubtasun ta sq'uelel, stuc'ulanel lec jba, xchi'uc ac'o oyuc lec jbijil, yu'un ja' jch'unoj li mantaletic avu'une.

⁶⁷ C'alal mu'yuc to'ox chquich' bic'tajesel ta scoj vocole, ch'ayemun to'ox ta be, pero li' ta orae ja' xa ta jch'un li ac'ope.

⁶⁸ Li vo'ote toj lecot, xchi'uc toj lec c'usitic chapas; chanubtasun lec ta xch'unel li amantale.

⁶⁹ Li boch'otic chopolique puru nopbil c'usi laj yalic ta jtojol; yan li vu'une scotol co'nton ja' la jch'un o li mantaletic avu'une.

⁷⁰ Li stuquique pimuben yo'ntonic jech chac c'u cha'al xepu, mu c'usi xa'ibeic o smelol; yan li vu'une toj xcuxet no'ox co'nton yu'un li amantaltaque.

⁷¹ Toj lec ti jech libic'tajesat ta scoj vocole, yu'un jech la jchan lec li amantaltaque.

⁷² Ja' toj ech'em tsots sc'oplal chca'ay li chanubtasel chloc' ta avee; ja' mu sta jech tsots sc'oplal chca'ay li c'anal taq'uin xchi'uc saquil taq'uine, ac'o me bats'i ep ta mil.

Yod

Yod

⁷³ Vo'ot ta ac'ob atuc laj apasun, laj ameltsanun; ac'bun ca'ibe lec smelol, ac'bun jchan lec li amantaltaque.

⁷⁴ Jech c'alal chiyilicun li boch'otic yich'ojicot ta muq'ue, xcuxet no'ox yo'ntonic cu'un, yu'un ja' jpatoj o co'nton yu'un li ac'ope.

⁷⁵ Yu'un xcotquin lec ti tuc' scotol li tojobtasel avu'une, xchi'uc ti oy lec razón avu'un ti laj avac'bun jvocole.

⁷⁶ Ja' yu'un li' ta orae muq'uibtasbun o co'nton ta sventa li c'uxubinel avu'une, jech chac c'u cha'al avalojbun vu'un li avajtunelune.

⁷⁷ Ac'bun tal li c'uxubinel avu'une, yu'un jech chcux banamil chca'ay; yu'un li mantaletic avu'une ja' xcuxetel co'nton chca'ay.

⁷⁸ Ac'o yalicuc ta q'uexlal li jtoybaetique, yu'un mu'yuc smelol ti chopol c'usi chispasbicune; li vu'une ja' no'ox ta jnopilan o c'usi chal li mantaletic avu'une.

⁷⁹ Ac'o tal xchi'inicun li boch'otic yich'ojicot ta muq'ue, ti chc'ot ta yo'ntonic li amantaltaque.

⁸⁰ Ac'o oyuc ta co'nton xch'unel li chanubtaseletic avu'une, yu'un jech mu xiyal ta q'uexlal.

Caf

Caf

⁸¹ Solel mu xa malabaj chca'ay li coltael avu'une, yu'un ja' jpatoj o co'nton yu'un li ac'ope.

⁸² Ic'uxub jsat ta smalael li c'usi avalojbune, jech laj cal: “¿Baq'uin to chtal spatbun co'nton?”, xichi.

⁸³ Ac'o me ja' jechun jech c'u cha'al nucul yavil ya'lel ts'usub ti cajal ta ba ch'ayiltique, pero mu'yuc ch'ayem o ta co'nton li amantale.

⁸⁴ ¿Jayib to c'ac'al tsc'an ta jts'ic, vu'un li avajtunelune? ¿Jayib to c'ac'al ta jmala chachapan li boch'otic laj yuts'intaicune?

⁸⁵ Li jtoyba-viniquetique laj xa sjoc'bicun jch'enal ya'yel, yu'un mu xch'unic c'usi chal li mantaletic avu'une.

⁸⁶ Scotol li mantaletic avu'une puru melelic, ja' yu'un coltaun me, yu'un mu'yuc smelol ti chiscontrainicune.

⁸⁷ Jutuc xa mu laj yulesicun ta banamil, pero mu'yuc jcomtsanoj o xch'unel li mantaletique avu'une.

⁸⁸ Cuxesbun lec co'nton yan velta ta sventa li c'uxubinel avu'une, yu'un jech xu' cu'un xch'unel li mantaletic avaloje.

Lámed

Lámed

⁸⁹ Muc'ul Dios, li ac'ope mu xlaj o sbatel osil; te oy o sbatel osil ta vinajel.

⁹⁰ Li alequil atuq'uile te oy o sbatel osil; vo'ot laj anacan li banamile, jech lec nacal icom o.

⁹¹ Vo'ot ta amantal lec oy scotol c'alal to tana li c'usitic apasoje, yu'un scotol ta xtunic avu'un.

⁹² Ti manchuc ja' oy ta co'nton la jc'an li amantale, ch'ayemun xa batel ta scoj tsots jvocol ti jechuque.

⁹³ Me jutuc mu'yuc bu ta jch'ay ta co'nton li amantaltaque; ja' xa no'ox te cuxulun o laj ca'ay.

⁹⁴ Coltaun me, yu'un vo'ot avu'uninojun, yu'un ja' no'ox la jch'un o c'usi chal li mantaletic avu'une.

⁹⁵ Li boch'otic chopolique te smala-malaic c'usi ora chismilicun, pero li vu'une ja' no'ox ta jch'un li c'usi avaloje.

⁹⁶ Scotol li c'usitic yan lec tuq'ue laj quil ti oy slajebe, pero li amantaltaque solel mu'yuc slajeb o.

Mem

Mem

⁹⁷ Li vu'une toj lec jc'anoj ta jyalel li amantaltaque; ja' batem o co'nton snopilanel sbejel c'ac'al.

⁹⁸ Scotol c'ac'al li' oy o ta co'nton; li vu'une ep xa libijub jech chac c'u cha'al li cajcontrataque.

⁹⁹ Vu'un xa ep la jna' jech chac c'u cha'al li jchanubtasvanejetic cu'une, yu'un ja' batem co'nton ta snopilanel o li chanubtaseletic avu'une.

¹⁰⁰ Vu'un xa ep la jna' jech chac c'u cha'al li moletique, yu'un ja' la jch'un li mantaletic avu'une.

¹⁰¹ Mu'yuc laj cac' batel cacan ta sbelal li c'usitic chopole, jech ivu' cu'un la jch'un li ac'ope.

¹⁰² Mu'yuc la jcomtsan li tojobtaseletic avu'une, yu'un vo'ot atuc laj achanubtasun.

¹⁰³ Li ac'ope ja' toj lec chi' ta lajesel chca'ay; ja' xcom xchi'il li spom muc'ta pome.

¹⁰⁴ Ta sventa amantaltac la jta o lec jbijil, ja' yu'un la jcontrain scotol li c'usitic mu meleluque.

Nun

Nun

¹⁰⁵ Ja' luz c'otem cu'un li ac'ope; ja' toj c'otem cu'un sventa chquil jbe.

¹⁰⁶ Oy c'usi laj cal ta jamal, persa ta jc'otes; ta jpas batel scotol li tuq'uil chanubtaseletic avu'une.

¹⁰⁷ Muc'ul Dios, bats'i toj tsots li jvocole; cuxesbun co'nton jech chac c'u cha'al avaloje.

¹⁰⁸ Muc'ul Dios, avocoluc lec me xavilbun li alequilal ti chloc' ta quee; tojobtasun lec ta sventa li chanubtaseletic avu'une.

¹⁰⁹ Scotol ora xi'eltic no'ox jba o ta scoj milel, pero mu'yuc ono'ox ta jch'ay o ta co'nton li amantaltaque.

¹¹⁰ Li boch'otic chopolique tsc'an chisyaquicun yalojic, pero mu'yuc ta jcomtsan o li bijubtaseletic avu'une.

¹¹¹ Ja' jmoton o sbatel osil chca'ay li amantaltaque, yu'un ja' te ta jta o xcuxetel co'nton.

¹¹² Ja' laj cac' co'nton o ta xch'unel li c'usitic avaloje, jech ta jpas o batel c'alal to ta slajeb.

Sámec

Sámec

¹¹³ Chopol chquil li jlo'lavanejetic ti ja' no'ox tsmaquic satile; yan li amantaltaque ja' lec jc'anoj o.

¹¹⁴ Vo'ot no'ox jnac'ubbail, jmacubbail c'otemot, yu'un ja' jpatoj co'nton o yu'un li ac'ope.

¹¹⁵ Voc'o abaic ta jtojol, chopol cristianoetic, yu'un vu'un jch'unojbe smantal li Dios cu'une.

¹¹⁶ Ac'bun lec jtsatsal jech chac c'u cha'al avaloje, jech xu' chicuxi to, jech mu alticuc chcac'be jba q'uexlal ti jpatoj co'nton avu'une.

¹¹⁷ Coltaun me, jech colem chicom, jech xu' j'ech'el ta jch'un o li amantaltaque.

¹¹⁸ Yu'un contra chavil li boch'o tscomtsanic xch'unel amantaltaque; li c'usi tsbol-nopique mu'yuc stu o.

¹¹⁹ Chajip jech chac c'u cha'al c'a'ep li boch'otic chopolic li' ta banamile, ja' yu'un li vu'une ja' ta jc'an ta jch'un li c'usi avaloje.

¹²⁰ Li jbec'tale ta xnic ta xi'el ta atojol, jech ta xquich' lec ta muc' li mantaletic avu'une.

Ayin

Ayin

¹²¹ Mu'yuc bu jcomtsanoj o spasel li c'usi lec, li c'usi tuq'ue, jech mu me xavac'un ta sc'ob li boch'otic tsc'an chiyuts'intaicune.

¹²² Pasbun c'usi lec, vu'un li avajtunelune; mu me xavac' xiyac'bicun jvocol li jtoyba cristianoetique.

¹²³ C'uxuben xa jsat ta smalael ti ac'o acoltaune; ta jmala ti colem chicom jech chac c'u cha'al avaloje.

¹²⁴ Vu'un li avajtunelune, c'uxubinun me; chanubtasun lec ta xch'unel li amantaltaque.

¹²⁵ Vu'un avajtunelun, ac'bun lec sbijil jol co'nton, yu'un jech xu' chcotquin lec li tojobtaseletic avu'une.

¹²⁶ Muc'ul Dios, ja' xa yorail ti ac'o apas avabtele, yu'un mu'yuc xa ta ch'unel o li amantaltaque.

¹²⁷ Yu'un li vu'une ja' jc'anoj o li mantaletic avu'une; jeloven jc'anoj jech chac c'u cha'al bats'i lequil c'anal taq'uin.

¹²⁸ Ja' toj lec chca'ay li mantaletic avu'une; ja' ta jcontrain scotol li c'usi mu meleluque.

Pe

Pe

¹²⁹ Toj jun yutsil li chanubtaseletic avu'une, ja' yu'un ta jch'un lec ta scotol jol co'nton.

¹³⁰ C'alal chich' cholbel smelol ac'ope, chjam jba jsat yu'un; ja' sventa chbijub li boch'otic mu'yuc to bijique.

¹³¹ Ta jach' que, ta jic' co'nton, yu'un toj juteb co'nton yu'un li amantaltaque.

¹³² Q'uelun me, c'uxubinun me, jech chac c'u cha'al chapasbe ono'ox li boch'otic sc'anojicote.

¹³³ Ja' ac'bun jpas batel li c'usitic avaloje; mu me xavac' xispasun ta mantal li c'usi chopole.

¹³⁴ Coltaun ta sventa li uts'intael chiyac'bicun cristianoetique, yu'un ja' ta jc'an ta jch'un li c'usitic avaloje.

¹³⁵ Xojobanuc asat ta jtojol, vu'un li avajtunelune; chanubtasun lec ta xch'unel li amantaltaque.

¹³⁶ Ep imal ya'lel jsat ta scoj ti mu'yuc chich' ch'unel o li amantaltaque.

Tsade

Tsade

¹³⁷ Muc'ul Dios, toj tuc' avo'nton li vo'ote; lec tuc' noxtoc li tojobtaseletic avu'une.

¹³⁸ Li mantaletic avaloje puru tuc', puru melel.

¹³⁹ Ta xislajesbun jtsatsal chca'ay ta sventa ti solel scotol co'nton jc'anoj o li ac'ope, yu'un li cajcontrataque mu sc'an xch'unic o.

¹⁴⁰ Li c'usi avaloje vinajem xa ti puru melel scotole, ja' yu'un lec jc'anoj o vu'un li avajtunelune.

¹⁴¹ Li vu'une toj biq'uitun xchi'uc bajbilun, pero mu'yuc jch'ayoj o ta co'nton li c'usitic avaloje.

¹⁴² Li alequil atuq'uile sbatel osil tuc' o; li mantaletic avu'une puru melelic.

¹⁴³ Toj ep vocol, ep at-o'nton laj ca'ay, pero li amantaltaque ja' laj yac'bun xcuxetel co'nton.

¹⁴⁴ Yu'un li amantaltaque staoj yav tuc' sbatel osil, jech ac'bun lec jbijil, jech xu' chicuxi to.

Cof

Cof

¹⁴⁵ Muc'ul Dios, scotol co'nton ta jc'anbot vocol; tac'bun li jc'ope yu'un ta jc'an ta jch'un li c'usitic avaloje.

¹⁴⁶ Vo'ot ta jc'anbot vocol, coltaun me, yu'un jech xu' cu'un xch'unel li chanubtaseletic avu'une.

¹⁴⁷ Sc'an to sacub osil ti chlic jc'anbot vocol ta atojole, yu'un ja' smuc'ulinoj o co'nton li ac'ope.

¹⁴⁸ C'alal yorail vayele, li jsate lec xa'ox viq'uil sventa ta jnopilan li ac'ope.

¹⁴⁹ Muc'ul Dios, a'ibun jc'op ta sventa ti toj lec avo'ntone; cuxesbun lec co'nton ta sventa li stuq'uil avo'ntone.

¹⁵⁰ Nopol xa oyic li boch'o stsoq'uet yo'ntonic tsc'an chiscontrainicune, pero nom oyic ta sventa li chanubtaseletic avu'une.

¹⁵¹ Yan li vo'ote, Muc'ul Dios, nopol oyot ta jtojol; melelic scotol li mantaletic avaloje.

¹⁵² Vo'one xa laj ca'ibe tal smelol li mantaletic avu'un ti j'ech'el laj avac' o ta jtojolcutique.

Resh

Resh

¹⁵³ Q'uelavil li jvocole, coltaun me, yu'un mu'yuc ch'ayem o ta co'nton li amantale.

¹⁵⁴ Va'ano aba ta jpojel, coltaun me; cuxesbun jol co'nton jech chac c'u cha'al avalojbun ono'oxe.

¹⁵⁵ Li boch'otic chopolique nom oy ta stojolic li coltael avu'une, yu'un mu ja'uc tsa'ic li chanubtaseletic avu'une.

¹⁵⁶ Muc'ul Dios, toj ep li c'uxubinel avu'une; ac'bun me jcuxlejal jech chac c'u cha'al avaloje.

¹⁵⁷ Toj ep li cajcontrataque xchi'uc li boch'otic chisnutsicune, pero li vu'une mu'yuc jcomtsanoj o li mantaletic avu'une.

¹⁵⁸ Mu jc'an jq'uelbe sat li boch'o ja' no'ox tsmaquic satile, yu'un mu sc'an xch'unic li ac'ope.

¹⁵⁹ Muc'ul Dios, q'uelavil, lec jc'anoj li amantaltaque; cuxesbun me co'nton ta sventa li c'uxubinel avu'une.

¹⁶⁰ Li ac'ope ja' melel scotol; staoj yav tuc' o, sbatel osil te oy o li c'usitic avaloje.

Sin

Sin

¹⁶¹ Li banquilaletique jech no'ox tsvovil contrainicun, pero te ono'ox chquich' o ta muc' li ac'ope.

¹⁶² Toj xcuxet no'ox co'nton yu'un li c'usi avaloje, jech chac c'u cha'al li boch'o tsta ep sc'ulejal ti toj xcuxet yo'ntone.

¹⁶³ Li epalc'ope chopol chquil, ta jcontrain; yan li amantaltaque lec jc'anoj.

¹⁶⁴ Vucub velta ta c'ac'al chcal alequilal ta sventa ti tuc' scotol c'usitic avaloje.

¹⁶⁵ Toj jun yo'nton li boch'otic ja' chch'unic li amantaltaque; mu'yuc bu tsbosi yacanic ta be.

¹⁶⁶ Muc'ul Dios, jmalaoj ti c'usi ora chacoltaune, xchi'uc ja' cochel spasel c'usi chal li amantaltaque.

¹⁶⁷ Jchabioj o lec ta co'nton li chanubtaseletic avaloje, yu'un scotol co'nton jc'anoj o ta j'ech'el.

¹⁶⁸ Ta jch'un, ta jpas scotol li chanubtaseletic, li tojobtaseletic avu'une; vo'ot xavotquin scotol ti c'u xi'elane.

Tau

Tau

¹⁶⁹ Muc'ul Dios, c'otuc me ta atojol li coq'uel cavanele; ac'bun lec jbijil jech chac c'u cha'al avaloje.

¹⁷⁰ C'otuc me li jc'op ta atojole; coltaun me, jech chac c'u cha'al avaloje.

¹⁷¹ Solel chtanij loq'uel ta que yalel li alequilale, yu'un laj achanubtasun ta xch'unel li amantaltaque.

¹⁷² Xila'et no'ox ta yalel li ac'ope, yu'un lec tuc' scotol li mantaletic avu'une.

¹⁷³ Ac'o tal ac'ob ta ora sventa chacoltaun, yu'un jnopoj ta jch'un o li amantaltaque.

¹⁷⁴ Muc'ul Dios, ja' oy ta co'nton o ti ac'o acoltaune, xchi'uc ja' xcuxetel co'nton chca'ay li chanubtasel avu'une.

¹⁷⁵ Ac'bun to jcuxlejal sventa chcal alequilal; ac'o scoltaun li tuq'uibtasel, li tojobtasel avu'une.

¹⁷⁶ Ch'ayemun to'ox ta be jech chac c'u cha'al chij ti ch'ayem ta bee. La' me, q'uelun, vu'un li avajtunelune, yu'un mu'yuc jch'ayoj o ta co'nton li amantaltaque.