Salmos 118 - Bible in Tzotzil de Chenalhó with Deuterocanon

Ja' no'ox stuc ech'em svu'el li Diose

¹ Tojbeic ta vocol li Muc'ul Diose yu'un ja' toj lec yo'nton, yu'un sbatel osil mu xlaj o li c'uxubinel yu'une.

² Israeletic, jech xavalic: “Sbatel osil mu xlaj o li c'uxubinel yu'une”, chianic.

³ Smomnich'nabtac Aarón, jech xavalic: “Sbatel osil mu xlaj o li c'uxubinel yu'une”, chianic.

⁴ Vo'oxuc ti avich'ojic o ta muc' li Muc'ul Diose, jech xavalic: “Sbatel osil mu xlaj o li c'uxubinel yu'une”, chianic.

⁵ C'alal oyun ta tsots vocole, la jc'anbe vocol li Muc'ul Diose; la stac'bun li jc'ope, jech la scoltaun.

⁶ Li Muc'ul Diose li' xchi'inojun, jech mu'yuc chixi'. ¿C'usi xu' yu'un chispasbicun li cristianoetique?

⁷ Li Muc'ul Diose li' xchi'inojun, ja' chiscoltaun; ta xquil ta jsat ti tsalbil chcomic li boch'otic chiscontrainicune.

⁸ Ja' lec ja' ta jpat co'ntontic yu'un li Muc'ul Diose; mu'yuc c'usi ta jtatic me ja' ta jpat co'ntontic yu'un li cristianoetique.

⁹ Ja' lec ja' ta jpat co'ntontic yu'un li Muc'ul Diose; mu'yuc c'usi ta jtatic me ja' ta jpat co'ntontic yu'un li banquilaletique.

¹⁰ Scotol li boch'otic mu'yuc xch'unojic Diose la setuicun, pero ja' no'ox ta sventa sbi Muc'ul Dios tsalbil ic'otic cu'un.

¹¹ La smaquicun lec ta jujujot, pero ja' no'ox ta sventa sbi Muc'ul Dios la jtsalic.

¹² La stsopoltaicun jech chac c'u cha'al xchanul muc'ta pom, pero te no'ox itu'p sc'ac'al yo'ntonic jech chac c'u cha'al chtu'p sc'ac'al ch'ix c'alal chc'aq'ue. Ja' no'ox ta sventa sbi Muc'ul Dios ti tsalbil icomique.

¹³ La snet'icun ta sc'ac'al yo'ntonic yu'un ac'o yalcun ta lum, pero la scoltaun li Muc'ul Diose.

¹⁴ Li stsatsal co'ntone, li xcuxetel co'ntone ja' li Muc'ul Diose, yu'un ja' jcoltavanej cu'un.

¹⁵ Li boch'otic tuc' yo'ntonique xcuxet no'ox yo'ntonic te ta snaic, yu'un ja' tspasic canal. Xvochetic no'ox ta sq'uejintael jech chac li'i: “Li svu'el Muc'ul Diose ja' ono'ox tspas canal.

¹⁶ Li svu'el Muc'ul Diose toj tsots ta jyalel. Li svu'el Muc'ul Diose ja' spasoj o canal”, xiic.

¹⁷ Mu'yuc to bu chicham, ta to xicuxi; ta to xcalbe sc'oplal c'usitic spasoj li Muc'ul Diose.

¹⁸ Toj tsots laj yac'bun jtoj jmul li Muc'ul Diose, pero mu'yuc to chac' chamcun.

¹⁹ Jambun sti' li ch'ulnae, yu'un te chi'och, ta jtojbe ta vocol li Muc'ul Diose.

²⁰ Yu'un ja' xch'ulna stuc; ja' te ch-ochic li boch'otic tuc' yo'ntonique.

²¹ Chajtojbot ta vocol yu'un laj ava'ibun li jc'ope, yu'un vo'ot laj acoltaun.

²² Li ton ti mu'yuc lec laj yilic li jpasnaetique ja' ono'ox i'och ta mero chiquin na.

²³ Le'e ja' la spas stuc li Muc'ul Diose; toj labal sba chquiltic ti jech la spase.

²⁴ Li jun c'ac'al li'i pasbil yu'un li Muc'ul Diose, jech cuxetuc no'ox co'ntontic, tse'incutic no'ox yu'un.

²⁵ Muc'ul Dios, avocoluc coltauncutic ta ora, lec ac'o batuc cu'uncutic.

²⁶ Toj lec li boch'o chtal ta sventa Muc'ul Diose; li' ta xch'ulna Muc'ul Dios ta xcaltic ti toj jun no'ox yutsile.

²⁷ Li Muc'ul Diose ja' Dios stuc; laj xa yac'butic tal li xojobale. Liquesic xa li q'uine; ich'ic tal li xanetic c'alal to ta xulubtac scajleb smoton li Diose.

²⁸ Vo'ot li Diosot cu'une, chajtojbot ta vocol; Dios cu'un, ta xacac'ot ta ich'el ta muc'.

²⁹ Tojbeic ta vocol li Muc'ul Diose, yu'un ja' toj lec yo'nton, yu'un sbatel osil mu xlaj o li c'uxubinel yu'une.