Salmos 116 - Bible in Tzotzil de Chenalhó with Deuterocanon

La stojbeic ta vocol Dios c'alal icoltaatic

¹ Lec jc'anoj li Muc'ul Diose, yu'un la stuc'ulanbun li jc'ope; laj ya'ibun ti xivocolet ta stojole.

² La sts'e'an lec xchiquin ti c'alal la jc'opane, ja' yu'un ti jayib c'ac'al cuxulune ja' ta jc'anbe o vocol ta stojol.

³ La sts'otun ta xch'ojon li lajele; lit'ab xa ta svocolal li yavil animaetique; laj xa xchucun ep vocol xchi'uc at-o'nton.

⁴ Pero lic jc'anbe vocol li Muc'ul Diose, jech laj calbe: “Muc'ul Dios, avocoluc coltaun”, xcut.

⁵ Li Muc'ul Diose tuc' yo'nton, lec sc'anojutic; ta melel ja' jc'uxubinvanej li Dios cu'untique.

⁶ Ja' chchabi li boch'otic mu'yuc c'usi xu' yu'unique; c'alal ja'o toj ep jvocole, la scoltaun.

⁷ Ja' yu'un li' ta orae jun no'ox co'nton yan velta, yu'un toj lec c'usi la spasbun li Muc'ul Diose.

⁸ Yu'un ja' la scoltaun loq'uel ta sventa lajel; la scoltaun ta sventa oq'uel, xchi'uc la scoltaun ta sventa muc xjaxbuj cacan.

⁹ Jech jun co'nton ta jpas c'usi tsc'an Muc'ul Dios li' ta banamil ta stojol li cristianoetique.

¹⁰ Yu'un jch'unoj ti ja' chiscoltaun li Muc'ul Diose, ja' yu'un chcal, ac'o me toj ep jvocol chca'ay.

¹¹ Jech laj cal ti c'alal i'ech' xa co'nton laj ca'ye: “Mu'yuc c'usi ta jta o yu'un li cristianoetique, puru j'epalc'opetic”, xichi.

¹² ¿C'uxi xu' ta jtojbe Muc'ul Dios ta sventa scotol li c'usi lec la spasbune?

¹³ Ta xcac'be smoton ta sventa ti la scoltaune; ta xquich' ta muc' li Muc'ul Diose.

¹⁴ Li' ta orae ta stojol scotol steclumal, ta jtojbe li c'usi caloj ta stojole.

¹⁵ Li Muc'ul Diose tsots sc'oplal cha'ay c'alal chchamic li boch'otic xch'unojique.

¹⁶ Muc'ul Dios, vu'un li avajtunelune, vu'un li yolun avajtunele, vo'ot laj atuch'bun li cadena bu to'ox chuculune.

¹⁷ C'alal chajtojbot ta vocole, ta jmilbot amoton; vo'ot no'ox ta jtojbot o ta vocol.

¹⁸ Ta stojol steclumal Muc'ul Dios ta jtojbe li c'usi caloj ta stojole.

¹⁹ Te ta jtoj ta yamaq'uil ch'ulna yu'un; te ta jtoj ta atojol vo'ot, lum Jerusalén. Ich'biluc ta muc' li Diose.