Salmos 115 - Bible in Tzotzil de Chenalhó with Deuterocanon

Ja' no'ox stuc ich'bil ta muc' li Muc'ul Diose

¹ Muc'ul Dios, mu me vu'cun xi'ich'atcutic ta muc', vo'ot ac'o aba ta ich'el ta muc' ta sventa ti ep c'uxubinel avu'une, xchi'uc ti melelic c'usi chavale.

² ¿C'u yu'un ti jech tsjaq'uic li boch'otic mu xch'unic Diose: “Bu oy li Dios yu'unique”?, ti xiique.

³ Li Dios cu'untique te oy ta vinajel; ja' tspas scotol li c'usitic tsc'an ta spase.

⁴ Li sloc'obaltac dios yu'unique pasbilic no'ox ta saquil taq'uin, ta c'anal taq'uin; pasbilic no'ox ta sc'ob cristianoetic.

⁵ Oy yeic, pero mu xc'opojic; oy satic, pero mu xilic osil.

⁶ Oy xchiquinic, pero mu xa'yic c'op; oy sni'ic, pero mu c'usi xa'ibeic yic'.

⁷ Oy sc'obic, pero mu c'usi stsac yu'unic; oy yacanic, pero mu xanovic; mu xu' chc'opojic xchi'uc li snuq'uique.

⁸ Ja' jech c'otemic ec li boch'otic ja' yabtel tsmeltsanique, xchi'uc li boch'otic ja' spatoj yo'ntonic yu'une.

⁹ Vo'oxuc israeletic, ja' pato avo'ntonic yu'un li Muc'ul Diose; ja' xu' yu'un chascoltaoxuc, chaxchabioxuc.

¹⁰ Smomnich'nabtac Aarón, ja' pato avo'ntonic yu'un li Muc'ul Diose; ja' xu' yu'un chascoltaoxuc, chaxchabioxuc.

¹¹ Vo'oxuc ti avich'ojic ta muc' li Muc'ul Diose, ja' no'ox pato avo'ntonic o yu'un; ja' xu' yu'un chascoltaoxuc chaxchabioxuc.

¹² Li Muc'ul Diose te oyutic o ta yo'nton; te chijyaq'uilanbutic o bendición. Chac'be bendición li smomnich'nab Israele; chac'be bendición li smomnich'nab Aarone.

¹³ Chac'be bendición li boch'otic yich'ojic ta muc', c'alal ta muc' ta biq'uite.

¹⁴ Ac'o sbolesoxuc li Muc'ul Diose, xchi'uc ac'o yepajes anich'nabic.

¹⁵ Ac'o yac'boxuc bendición li Muc'ul Diose, ja' li boch'o la spas vinajel xchi'uc banamile.

¹⁶ Li vinajele ja' oy ta sc'ob li Muc'ul Diose; yan li banamile ja' laj yac'be sventain li cristianoetique.

¹⁷ Li boch'otic ch'anxaxi mochajtic ta yut banamile, li boch'otic chamenic xae mu xa xu' chalbeic slequilal li Muc'ul Diose.

¹⁸ Pero li vu'utique calbetic slequilal li' ta ora xchi'uc c'alal to ta sbatel osil. Ich'biluc o ta muc' li Muc'ul Diose.