Salmos 114 - Bible in Tzotzil de Chenalhó with Deuterocanon

Laj to sna'ic ti ta stsatsal Dios iloq'uic tal ta Egiptoe

¹ C'alal iloc' tal ta Egipto li Israele, c'alal iloc' tal ta stojol yanlum cristianoetic li smomnich'nab Jacobe,

² li Judae ja' xch'ulna Muc'ul Dios ic'ot; li Israele ja' yu'un Muc'ul Dios ic'ot.

³ Li nabe ijatov ta anil c'alal laj yil li Israele; li uc'um Jordane isut ta anil ta sva'lupat.

⁴ Li muc'tic vitsetique xbitlajetic no'ox jech chac c'u cha'al chijetic; li bic'tal vitsetique xlut'lajetic no'ox jech chac c'u cha'al bic'tal chijetic.

⁵ Nab, ¿c'usi laj apas ti lajatov ta anile? Jordán, ¿c'usi laj apas ti lasut ta ava'lupate?

⁶ Muc'tic vitsetic, ¿c'u yu'un ti xabitlajetic no'ox jech chac c'u cha'al chijetique? Bic'tal vitsetic, ¿c'u yu'un ti xalut'lajetic no'ox jech chac c'u cha'al bic'tal chijetique?

⁷ Banamil, nican ta stojol li Avajvale; nican ta stojol li Dios yu'un Jacobe.

⁸ Ja' la sc'atajes ta loq'uem-vo' li ch'entique; ja' la sc'atajes ta nio'etic li tontique.