Salmos 113 - Bible in Tzotzil de Chenalhó with Deuterocanon

Li Diose chc'uxubin c'alal ta me'onetic

¹ Ich'biluc ta muc' li Diose. Jtuneletic yu'un Muc'ul Dios, albeic slequilal; ich'beic ta muc' sbi li Muc'ul Diose.

² Ich'biluc o ta muc' sbi li' ta ora li Muc'ul Diose xchi'uc c'alal to ta sbatel osil.

³ Ac'o albatuc batel slequilal ta sloq'uem c'ac'al c'alal to ta smaleb c'ac'al.

⁴ Ja' banquilal ta jujun muc'tic lum li Muc'ul Diose; li yutsilal slequilale muyem c'alal ta sba yac'ol vinajel.

⁵ Mu'yuc boch'o xco'laj jech chac c'u cha'al li Muc'ul Dios cu'untic, ti te chotol tspas mantal ta toyole,

⁶ ti oy ta yo'nton tsnijan sba sventa tsq'uel yalel tal li vinajel banamile.

⁷ Ja' tstots liquel ta banamil li me'onetique; ja' tsloq'ues tal ta c'a'eptic li jc'anlimosnaetique.

⁸ Co'ol chchotan xchi'uc li banquilaletique xchi'uc li jpasmantaletic ta lume.

⁹ Ja' chac' alajuc li boch'o mu ono'ox sna' x'alaje, jech xcuxet no'ox yo'nton chnaqui ta sna stuc, yu'un me'il xa c'otem. Ich'biluc ta muc' li Muc'ul Diose.