Salmos 112 - Bible in Tzotzil de Chenalhó with Deuterocanon

Toj lec chbat li boch'o chich' ta muc' Muc'ul Diose

¹ Ich'biluc ta muc' li Diose. Xcuxet no'ox yo'nton li boch'o chich' ta muc' Muc'ul Diose, ti ja' muiben o xa'ay snopbel li smantaltaque.

² Lec chbat li xnich'nabtaque, xchi'uc oy lec stsatsalic; ta x'ac'bat slequilal yutsilalic li smomnich'nabtac boch'o tuc' yo'ntonique.

³ Ta x'ayin ep sc'ulejal te ta sna, xchi'uc mu xlaj o li slequil yo'ntone.

⁴ Xojoban ta stojol li yantic ti tuc' yo'ntonique, yu'un lec chc'uxubinvan; oy slequil yo'nton xchi'uc tuc' yo'nton.

⁵ Li boch'o lec yo'ntonique chc'uxubinvanic, chac' ta q'uexel c'usi oy yu'unic; lec tuc' tsventain scotol li c'usitic oy yu'une.

⁶ Ja' yu'un me jutuc mu xyal o ta lum. Li boch'o tuc' yo'ntone te oy o sc'oplal.

⁷ Mu xi' c'alal me oy chopol lo'il chtal ta stojole, yu'un bats'i jun yo'nton o; xch'unoj o ti ja' chcoltaat yu'un li Muc'ul Diose.

⁸ J'ech'el lec nacal o li yo'ntone, me jutuc mu'yuc ta xi'; sna'oj ti tsalbil ono'ox chcom li yajcontrae.

⁹ Tspuc c'usitic oy yu'un, chac'be me'onetic; mu sna' xlaj o li slequil yo'ntone, jech lec sc'oplal, lec ich'bil ta muc'.

¹⁰ Li boch'o chopol yo'ntone toj chopol chc'ot yo'nton ti c'alal chile; ta xc'ux ye yu'un tsalbil chc'ot o. Li c'usi oy ta yo'ntone chlaj sc'oplal o.