Salmos 111 - Bible in Tzotzil de Chenalhó with Deuterocanon

Tsc'an chcalbetic slequilal Dios ta sventa ti toj lec yabtele

¹ Ich'biluc ta muc' li Muc'ul Diose. C'alal te jmoj tsobolun jchi'uc li boch'otic tuc' c'usi tspasique, ta scotol co'nton ta xquich' ta muc' li Muc'ul Diose.

² Toj muc'tic c'usitic spasoj li Muc'ul Diose; xu' tsnopic lec c'u x'elan li boch'otic oy ta yo'ntonic tsc'an tsna'ique.

³ Toj yan yutsil, toj c'upil sba li yabtele; li slequil stuq'uile sbatel osil te oy o.

⁴ Mu xch'ay o ta o'ntonal ti toj labalic sba c'usi spasoje; ja' jc'anvanej jc'uxubinvanej stuc li Muc'ul Diose.

⁵ Ja' chac'be sve'elic li boch'otic yich'ojic ta muq'ue; mu xch'ay o ta yo'nton li c'usi xchapanoj ta stojolique.

⁶ Laj yac'be yil steclumal ti oy stsatsal li yabtele; laj yac'be yich'beic yosil sbanamilic li yantic lumetique.

⁷ Li c'usitic spasoje puru lec, xchi'uc puru tuc'; mu sna' xjel o li mantaletic yu'une.

⁸ Ja' jech chcom o sbatel osil c'alal to ta slajeb banamil; yu'un tuc' pasbil, xchi'uc melelic.

⁹ La stacbe tal coltael li steclumale; sbatel osil mu xlaj sc'oplal o li c'usi xchapanoje. Ja' no'ox stuc Ch'ul Dios, ja' no'ox stuc xi'bil.

¹⁰ Li sliqueb c'u x'elan xu' chijbijube ja' ti chquich'tic ta muc' li Muc'ul Diose; li boch'otic ja' tspasilanic o c'usi chal li smantaltac Muc'ul Diose yu'un lec bijic, lec sna'ic snopel. Ich'biluc o ta muc' sbatel osil li Diose.