Salmos 11 - Bible in Tzotzil de Chenalhó with Deuterocanon

Ja' mero smuc'ul co'ntontic li Muc'ul Diose

Q'ueoj yu'un David; ja' la sventain li banquilal yu'un jq'ueojetique.

¹ Ja' no'ox jpatoj o co'nton ta stojol li Muc'ul Diose, Altic ti jech chiyalbicune: “Jatovan batel ta anil ta vitsetic, jech chac c'u cha'al mutetic.

² Q'uelavil li boch'otic chopol yo'ntonique, snitoj xa li yac'ubil sflechaique, naca xa mu tscoltaic batel li flechae, yu'un tsc'an chac'beic ta mucul li boch'otic tuc' yo'ntonique.

³ Me lic soquesic li mantaletic te ta slumalique, ¿c'usi xu' tspasic li boch'otic tuc' yo'ntonique?”, xiyuticun.

⁴ Pero li Muc'ul Diose te nacal ta xch'ulna; oy lec smuc'ta chotleb te ta vinajel. Lec viq'uil o li sate, lec chil scotol c'usi tspas li cristianoetique;

⁵ tsq'uel c'usi tspas li boch'o lequique xchi'uc li boch'o chopolique. Li boch'o ja' no'ox puru uts'intavanej oy ta yo'ntonique, chopol chil o.

⁶ Chac'be tsots svocolic jech chac c'u cha'al chac' tsots vo'; chac'be tal c'oc' xchi'uc azufre xchi'uc ic', jech chchic' o scotol. Ja' no'ox jech stojol tsc'an chich'ic.

⁷ Yu'un li Muc'ul Diose tuc' yo'nton, lec sc'anoj ec li boch'otic tuc' yo'ntonique; scotol c'ac'al te xchi'inoj o li boch'o lec c'usi tspasique.