Salmos 109 - Bible in Tzotzil de Chenalhó with Deuterocanon

Sc'anel coltael ta stojol Dios

Q'ueoj yu'un David. Ja' la sventain li banquilal yu'un jq'ueojetique.

¹ Dios, vo'ot ti chcal alequilale, mu me teuc no'ox ch'an xachi.

² Yu'un li j'epalc'opetique, li boch'otic chopolique ep c'usi chopol chiyalbicun; puru epalc'op chalic ta jtojol xchi'uc li yeique.

³ Puru sc'ac'al yo'ntonic li c'usi chalic ta jtojole; jeche' no'ox ti chistsaquicun ta c'ope.

⁴ Ja' spacol chiyac'bicun ti lec la jc'uxubinique, pero li vu'une vo'ot no'ox ta jc'opanot.

⁵ Li vu'une lec c'usi la jpasbeic, pero li stuquique chopol c'usi chispasbicun. Li vu'une lec la jc'anic, pero li stuquique stsoq'uet yo'ntonic cu'un.

⁶ Ac'o ta chapanel ta stojol li boch'o chopol yo'ntone; ja' ac'o tic'batuc smul yu'un li jpojvanej yu'une.

⁷ C'alal chich' chapanele, ac'o oyuc smul chcom; li c'usi chal c'alal tspoj sbae, ja' ac'o c'atajuc ta smul.

⁸ Mu me xcuxi ep c'ac'al; ac'o batuc ta yan li yabtele.

⁹ Ac'o comicuc ta me'on li xnich'nabe; ac'o comuc ta me'on ants li yajnile.

¹⁰ Ac'o xanovicuc ta buyuc no'ox li xnich'nabe, ac'o pasicuc ta jc'anlimosna; ac'o loq'uesaticuc o batel ta snaic, ac'o bat sa' sve'elic ta nom.

¹¹ Li c'usitic oy yu'une ac'o yich' li boch'o tsc'an ep sjol staq'uin c'alal chac' ta q'uexele; ja' ac'o spoj yan cristianoetic li c'usi chloc' ta yabtele.

¹² Ac'o mu'yucuc bu tsta o c'uxubinel; ac'o mu'yucuc boch'o abul sba chil li me'on ololetic chcom yu'une.

¹³ Ac'o tubuc o sbi c'alal ta alab nich'nab; j'ech'el ac'o ch'ayuc o sts'unubal ta banamil.

¹⁴ Ac'o t'abuc ta yo'nton Muc'ul Dios c'usi chopol spasoj li stote, xchi'uc mu me teuc no'ox xch'ay smul li sme'e.

¹⁵ Te ac'o t'abaluc o ta yo'nton li Muc'ul Diose, ac'o stu'pbe o sc'oplal ta banamil.

¹⁶ Yu'un me jutuc mu'yuc xc'uxubinvan. Laj yuts'inta li boch'otic oy svocolique xchi'uc li me'onetique; la smilan li boch'otic abul sbaique.

¹⁷ Yu'un ja' la sc'anbe svocol li yantique, jech ja' ac'o taluc ta stojol stuc. Ja' muc sc'an li bendicione, jech ac'o loc'uc o batel ta stojol.

¹⁸ La xpix sba ta yaq'uel vocol jech chac c'u cha'al sc'u' ti slapoj o scotol c'ac'ale, jech i'och batel ta yut sbec'tal jech chac c'u cha'al vo'; i'och c'alal ta sbaquiltac jech chac c'u cha'al aceite.

¹⁹ Pixil lec ac'o comuc o jech chac c'u cha'al chpix sba ta sc'u'; lec mit'il ac'o comuc o jech chac c'u cha'al xchuc.

²⁰ Ja' jech ac'o ac'batuc stoj yu'un Muc'ul Dios li cajcontrataque, xchi'uc li boch'otic chopol chc'opojic ta jtojole.

²¹ Pero li vu'une, Muc'ul Dios, Cajval cu'un, c'uxubinun me ta sventa xu' cha'ich'at ta muc'; coltaun me ta sventa li c'uxubinel avu'un ti toj leque.

²² Yu'un toj abul jba, mu'yuc c'usi oy cu'un; solel tuch'em xa ya'yel li yut co'ntone.

²³ Ta xa xisacch'ay batel jech chac c'u cha'al yaxinaltic; ta xa xicuchat batel ta ic' jech chac c'u cha'al c'ulub.

²⁴ Solel i'alub cacan ta scoj ti mu'yuc chive'e; libacub xa ta scoj li vi'nale.

²⁵ Puru na'leel chiyac'bicun; c'alal chisq'uelicune stse'inic, sjimulan no'ox sjolic.

²⁶ Muc'ul Dios, coltaun me; coltaun ta sventa ti toj ep slequil avo'ntone.

²⁷ Ac'o sna'ic ti vo'ot chacoltaune, ti vo'ot chapas scotole.

²⁸ Mu'yuc sc'oplal chca'ay ti chchopolc'opojic ta jtojole, ja' no'ox venta ti chavac'bun jlequilal li vo'ote. Ac'o q'uexovicuc li stuquique; ac'o cuxetuc no'ox co'nton vu'un li avajtunelune,

²⁹ Ac'o pixicuc o ta q'uexlal li cajcontrataque; pixil ac'o comicuc o ta q'uexlal jech chac c'u cha'al chpix sbaic ta sc'u'ic.

³⁰ Mu xlaj o co'nton ta stojbel ta vocol Muc'ul Dios jchi'uc li quee; ta xcalbe slequilal ta stojol ep cristianoetic.

³¹ Yu'un ja' tsva'an sba ta spojel li me'onetique; ja' tscolta li boch'o chapal xa chich'ic milele.