Salmos 108 - Bible in Tzotzil de Chenalhó with Deuterocanon

Ja' no'ox ech'em svu'el li Diose

Q'ueoj yu'un David.

¹ Dios cu'un, li co'ntone chapal xa sventa chayich'ot ta muc', chapal xa sventa chasq'uejintabot q'ueojetic. Co'nton, cuxo xa.

² Sonetic, licanic xa; sac osil, julovan xa me.

³ Muc'ul Dios, chcal alequilal ta stojol li cristianoetique; ta jq'uejinta alequilal ta stojol li yantic lumetique.

⁴ Yu'un toj muc' li c'uxubinel avu'une, xjelov to smuc'ul jech chac c'u cha'al li vinajele; staoj c'alal to vinajel li c'usi melel chavale.

⁵ Dios cu'un, ich'bilot ta muc' c'alal to ta vinajel; nojem ta alequilal sbejel li banamile.

⁶ Coltauncutic ta sventa li avu'el atsatsale, yu'un jech colem chcomic li boch'otic lec ac'anoje; tac'bun me li jc'opcutique.

⁷ Li Diose jech laj yal tal te ta xch'ulna: “Toj xcuxet no'ox co'nton c'alal ta jvoq'uilanbeic jteclumal li yosilal Siqueme, xchi'uc c'alal ta jpucbeic li stenlejaltic Sucote.

⁸ Li Galaad xchi'uc Manasese ja' cu'untac; li Efraine ja' tsatsal taq'uin sventa smac jol c'otem; li Judae ja' jvaston c'otem sventa ta jpas mantal.

⁹ Yan li Moabe ja' pocobc'obal c'otem cu'un; li Edome ta jten batel ta jxonob. Chiq'uejin ta sventa ti tsalbil chc'ot cu'un li filistaetique”, xi.

¹⁰ ¿Boch'o xu' chiyic'un batel te ta lum ti lec setbil ta tsatsal coraltone? ¿Boch'o xu' chiyic'un batel c'alal ta Edom?

¹¹ Yu'un li vo'ote, Dios cu'un, laj xa abajuncutic; mu'yuc xa chloc' achi'in ta pasc'op li cajsoldadocutique.

¹² Coltauncutic xa ta stsalel li cajcontracutique, yu'un li coltael chac' cristianoetique mu'yuc stu.

¹³ Ja' no'ox ta sventa Dios xu' ta jpastic li c'usitic tsotsique; ja' xu' yu'un chixpech'butic ta teq'uel li cajcontratique.