Salmos 106 - Bible in Tzotzil de Chenalhó with Deuterocanon

La stoy sbaic ta stojol Dios li israeletique

¹ Ich'biluc ta muc' stuc li Muc'ul Diose. Ich'ic ta muc' li Muc'ul Diose, yu'un ja' toj lec yo'nton, yu'un sbatel osil mu xlaj o li c'uxubinel yu'une.

² ¿Boch'o xu' yu'un chal c'u x'elan svu'el li Muc'ul Diose? ¿Boch'o xu' yu'un yalbel ti c'u yepal slequilale?

³ Xcuxet no'ox yo'nton li boch'otic yich'oj lec sjam smelolique, ti scotol ora ja' tspasic o c'usitic tuq'ue.

⁴ Muc'ul Dios, na'un me ec li vu'une; oyucun me ta avo'nton ec ti c'alal chacolta li ateclumale,

⁵ yu'un jech chquil ec li c'usi lec chapas ta stojolique, jech xcuxet no'ox co'nton, jun no'ox co'nton jchi'uc li avu'untac ti oyic ta atojole.

⁶ Jtaoj jmulcutic ec jech chac c'u cha'al li jtot jme'cutic ta vo'onee; la jpascutic ec li c'usi chopole xchi'uc li c'usi mu xtune.

⁷ Li jmoltot jyame'cutic te ta Egiptoe mu'yuc tsots sc'oplal ta yo'ntonic li sq'uelubiltac atsatsal laj apase. Ich'ay ta yo'ntonic ti toj ep c'uxubinel avu'une; la stoy sbaic ta atojol te ta ti' Tsajal Nab.

⁸ Pero laj acolta, laj avac' ta ilel li avu'ele, yu'un jech ac'o ich'atan ta muc'.

⁹ Laj avalbe mantal li Tsajal Nabe, jech itaquij; ja' te laj avac' jelovicuc tal ta mero snatil li nabe, co'ol c'u cha'al taqui-banamil laj ya'yic.

¹⁰ Laj acolta loq'uel ta sc'ob li yajcontraique; laj apoj loq'uel ta sc'ob li boch'otic stsoq'uet yo'ntonique.

¹¹ Laj amucbe ta nab li yajcontraique, me junuc mu'yuc cuxul icomic.

¹² Jech te la xch'unic li c'usi avaloje; te lic sq'uejintaic alequilal.

¹³ Pero ta jliquel no'ox ich'ay ta yo'ntonic li atsatsale; muc smalaic chc'ot ta pasel li c'usi achapanoje.

¹⁴ Te ta xocol banamil la sq'uelbicot avo'nton; laj yaq'uic persa ti ac'o apas li c'usi tsc'an yo'ntonique.

¹⁵ Laj avac'be li c'usi la sc'anique; tsatsal chamel laj atacbe tal ta stojolic.

¹⁶ C'alal te oyic ta scarpanaique, lic sti'-o'ntaic li Moisese; lic scontrainic noxtoc li Aarón ti t'ujbil yu'un Muc'ul Diose.

¹⁷ Jech ijav li banamile, te ibic'at ochel li Datane, xchi'uc te i'och batel scotol svinictac li Abirame.

¹⁸ Iloc' c'oc' te ti bu tsobolique; te ic'aq'uic o scotolic ti jayib chopol yo'ntonique.

¹⁹ Te ta vits Horeb la spasbeic sloc'obal jcot biq'uit vacax; te lic squejan sbaic ta stojol li c'usi loc'tabil ta unijesbil taq'uine.

²⁰ Li Dios ti ech'em svu'ele la spasbeic xq'uexol ta jcot sloc'obal vacax ti sna' slo' vomole.

²¹ Ja' ich'ay ta yo'ntonic li Diose, ja' li jcoltavanej yu'unique; ja' ti la spas muc'tic sq'uelubil stsatsal te ta Egiptoe,

²² ti la spas ep xch'ayubil o'ntonal te ta Cam banamile, xchi'uc ti toj labal sba c'usi la spas ta Tsajal Nabe.

²³ Li Diose laj yal ti chules ox scotolique, pero li Moisés ti t'ujbil yu'un Diose, ja' la sva'an sba ta stojol li Diose, la smac li xchi'iltaque, jech te ilamaj sc'ac'al yo'nton li Diose, mu'yuc bu laj yules o.

²⁴ Ts'acal lic sbajic noxtoc li lequil banamil ch-ac'batique; muc xch'unic li c'usi albilic ono'ox ta jamal yu'un Diose.

²⁵ Te ta scarpanaic iliquic ta bic'talvulajetel ta stojol li Muc'ul Diose; muc xch'unbeic li c'usitic laj yale.

²⁶ Ja' yu'un li Diose la sye' sc'ob ta stojolic; laj yal ta jamal ti te no'ox tsmil scotol ta xocol banamile,

²⁷ ti j'ech'el tsbic'tajesbe o sc'oplalic ta stojol li yan lumetique, ti tspuc batel ta yantic banamile.

²⁸ Ts'acal lic yich'ic ta muc' noxtoc li Baal-peore; lic sti'beic smoton li c'usi mu cuxulicuque.

²⁹ Jech ilic sc'ac'al yo'nton Dios yu'unic ta sventa li c'usi la spasique, jech ital tsatsal chamel ta stojolic.

³⁰ Pero ilic li Fineese, la smil li boch'o oy smule, jech ipaj li tsatsal chamel ta stojolique.

³¹ Li Diose mu xch'ay o ta yo'nton ti tuc' c'usi la spas li Fineese, ta jayc'oluc cristianoetic chjelov.

³² C'alal te oyic ta epal vo' ta Meribae, te lic sa'beic sc'ac'al yo'nton noxtoc li Diose, ja' ta scojic ti te la sta o svocol ta stojol Dios li Moisese.

³³ Yu'un laj yaq'uic jelovuc ye ta stojol li Diose; muc snop lec c'usi laj yal li Moisese.

³⁴ Jech noxtoc muc xulesic scotol li yajvaltac lumetic ti i'albatic yu'un Muc'ul Dios ac'o yulesique.

³⁵ Jech te lic scap sbaic xchi'uc li yan lumetique; te lic xchanbeic c'u x'elan li stalelique.

³⁶ Ja' lic yich'beic ta muc' li diosetic yu'unique; ja' ta scoj ti c'an ulesaticuc oe.

³⁷ Yu'un la smilbeic smotonin squerem stsebic li pucujetic le'e.

³⁸ La smalbeic xch'ich'al li boch'o mu'yuc smule, ja' li xch'ich'al squerem stsebic ti la smilbeic smotonin li c'usi cuybil ta diosetic te ta Canaane, jech ibolib o ta scoj ch'ich' li yosilalique.

³⁹ Jech la sbolibtas sbaic o ta sventa li yabtelique; jmulavil vinic ants ic'otic o ta scoj ti jech la spasique.

⁴⁰ Ja' yu'un li Muc'ul Diose tsots i'ilin ta stojol li steclumale; j'ech'el la sbaj o.

⁴¹ Lic yac' ochicuc ta sc'ob yantic lumetic; ja' iventainatic o yu'un li yajcontraique.

⁴² Chucbil icomic o yu'un li yajcontraique; solel i'ilbat sbic'talic o.

⁴³ Ep ta velta icoltaatic yu'un Dios, pero muc ono'ox sjel o li yo'ntonique, jech solel abul sba icomic o ta scoj xchopolilic.

⁴⁴ Pero li Diose abul sbaic laj yil ti c'alal ep svocolique, jech laj ya'ibe li yoq'uel yavanelique.

⁴⁵ Yu'un it'ab ta yo'nton li c'usi xchapanoj ono'ox ta stojolique, jech lic c'uxubajuc ta yo'nton, yu'un toj ep c'uxubinel yu'un.

⁴⁶ C'alal ta yajcontraic la stijbe yo'nton, yu'un jech ac'o c'uxubinaticuc yu'un noxtoc.

⁴⁷ Muc'ul Dios, coltauncutic, vo'ot li Diosot cu'uncutique; tsobuncutic xa loq'uel ta stojol li yantic lumetique, yu'un jech xu' chaquich'otcutic ta muc', jech xcuxet no'ox co'nton ta jq'uejintacutic alequilal.

⁴⁸ Sbatel osil ac'o ich'atuc o ta muc' li Muc'ul Diose, ja' li Dios yu'un Israele. Jech ac'o yal scotol li cristianoetique: “Jechuc, jech ac'o c'otuc ta pasel; ich'biluc o ta muc' stuc li Muc'ul Diose”, ac'o xiicuc.