Salmos 105 - Bible in Tzotzil de Chenalhó with Deuterocanon

Toj lec c'usitic la spas ta stojol israeletic li Diose

¹ Ich'ic ta muc' li Muc'ul Diose, albeic slequilal li sbie; alic batel ta jujun lum ti c'u x'elan yabtele.

² Q'uejinanic, la'etanic no'ox ta sventa chavich'ic ta muc'; lo'iltaic scotol li c'usitic toj muc'tic spasoje.

³ Junuc no'ox avo'ntonic ta sventa li xch'ul bie; cuxetuc no'ox yo'nton li boch'otic ja' tsa'ic li Muc'ul Diose.

⁴ Ja' no'ox sa'ic o li Muc'ul Diose xchi'uc li svu'ele; ja' no'ox sa'ic o scotol ora.

^5-6 Vo'oxuc li smomnich'naboxuc Abrahame, ja' li yajtunel Diose, vo'oxuc li smomnich'naboxuc Jacob ti t'ujbiloxuc yu'un Diose, vuleso ta ajolic scotol li sq'uelubiltac stsatsal spasoje, xchi'uc li chanubtaseletic yaloje.

⁷ Yu'un li Muc'ul Diose ja' Dios cu'untic stuc; ja' sventainoj scotol li banamile.

⁸ Ac'o me jmil (1,000) ta c'ol cristianoetic ijelov, pero mu ono'ox xch'ay o ta yo'nton li c'usi xchapanoje,

⁹ ja' li c'usi xchapanoj ono'ox ta stojol li Abrahame, ti jamal yalojbe Isaac ti chc'ot ta pasele.

¹⁰ Ja' jun mantal icom o ta sventa li Jacobe; ja' jech chapal icom o ta stojol li Israele.

¹¹ Jech laj yalbe: “Vo'ot chacac'bot li Canaán banamile; ja' avu'un o chcom”, xut.

¹² Mu'yuc epic, unin jtsob yanlumetic ic'otic.

¹³ Ijelovic batel ta jujun muc'tic lum; ijelovic batel ta stojol jujun muc'tic ajvaliletic.

¹⁴ Pero li Muc'ul Diose muc xac' lajicuc ta uts'intael; laj yalbe tsots mantal li muc'tic ajvaliletique, jech laj yalbe:

¹⁵ “Mu me xavac' ac'obic ta stojol li cu'untaque; mu me c'usi chopol xapasbeic li j'alc'opetic cu'une”, xut.

¹⁶ Ts'acal to laj yac' taluc vi'nal te ta yosilalic; la spojbe scotol li sve'elique.

¹⁷ Pero ba'yuc xa ono'ox stacoj jelovel li Josee, ja'o ti c'alal laj yich' chonel batel ta mozoile.

¹⁸ Ituch' batel yacan ta cadena yu'unic; la slats'beic snuc' ta alal taq'uin.

¹⁹ Ja' to icol ti c'alal ic'ot ta pasel li c'usi laj yale, ja' li c'usi i'ac'bat sna' yu'un Muc'ul Diose.

²⁰ Li ajvalile la sloq'ues ta chuquel; li jpasmantale la scolta.

²¹ Lic yac'be sventain scotol li c'usi oy yu'un ta snae; ja' ajvalil ic'ot yu'un scotol li c'usitic oy yu'une,

²² yu'un jech ac'o chanubtasbatuc, ac'o bijubtasbatuc li moletic, li banquilaletic yu'une.

²³ Ts'acal ibat ta Egipto li Israele, ja' li Jacobe; te ic'ot nacluc ta Cam banamil.

²⁴ Li Diose te laj yac' epajicuc, solel ibolic ta jyalel; xjelov to jech xu' yu'unic jech chac c'u cha'al li yajcontraique.

²⁵ Li Diose lic syanijesbe yo'ntonic li egiptoetique, yu'un ac'o yich' contrainbel li steclumale, jech lic yich' uts'intabel li yajtuneltaque.

²⁶ Ja' yu'un li Diose lic stac batel li yajtunele, ja' li Moisese, xchi'uc li Aarón ti t'ujbil yu'une.

²⁷ Laj yac'be spasic sq'uelubiltac stsatsal; muc'tic sq'uelubil laj yaq'uic ta ilel te ta Cam banamil.

²⁸ La stac tal ic' osil, jech i'ic'ub scotol. Pero li stuquique muc xch'unic c'usi i'albatic yu'un li Diose.

²⁹ Jech la sc'atajesbeic ta ch'ich' noxtoc li ya'alique; la smil scotol li choyetique.

³⁰ Ital ep xch'uch'etic noxtoc ta scotol yosilalic, i'ochan c'alal to ta svayab-na li ajvalile.

³¹ C'alal ic'opoj li Diose, ital ep xcochetic noxtoc; solel ic'ubenic no'ox vulel; inoj ta uch' noxtoc scotol li yosilalique.

³² Mu x'ac'batic yalel tal vo', puru bot i'ac'batic, xchi'uc ta puru chauc ilaj li yosilalique.

³³ Ilaj scotol li ts'usubtic xchi'uc li higoetic yu'unique; ic'asan li te'etic te ta yosilalique.

³⁴ Ic'opoj noxtoc li Diose, jech ital epal c'ulubetic; solel inoj yu'unic li banamile.

³⁵ Ja' la slo'ic scotol li vomoletic te ta yosilalique; la slajesic scotol li c'usitic sts'unojique.

³⁶ La smilbe noxtoc scotol li sba squeremic te ta sjunul yosilalique, ja' li sba sts'unubique.

³⁷ Ts'acal lic sloq'ues batel li steclumale; ep c'anal taq'uin, saquil taq'uin yich'ojic loq'uel. Scotol li jaychop sts'unubal Israele lec tsotsic scotolic.

³⁸ C'alal iloq'uic batele, xcuxet no'ox yo'nton li egiptoetique, yu'un toj ep xi'elal cha'yic.

³⁹ Li Diose la slam batel toc sventa tsmac o li steclumale, xchi'uc laj yac'be c'oc' sventa chil sbeic ta ac'ubaltic.

⁴⁰ C'alal la sc'an sve'elique, i'ac'batic tal ep x'ub sti'ic; i'ac'bat sve'ic li vaj liquem tal ta vinajele, lec inojic o.

⁴¹ La sjam jun ch'en noxtoc, te iloc' tal ep vo'; ixanov batel yoc ta xocol banamil jech chac c'u cha'al jun uc'um.

⁴² Yu'un li Diose it'ab ta yo'nton li xch'ul c'ope, ja' li c'usi yalojbe ono'ox ta jamal li Abrahame, ja' li yajtunele.

⁴³ Xcuxet no'ox yo'nton la sloq'ues tal li steclumale; x'avlajetic no'ox loq'uel tal, yu'un toj xcuxet yo'nton laj ya'yic.

⁴⁴ Ja' laj yac'be yu'uninic li yosilal yantic lumetique; ja' laj yac'be slajesic li c'usitic xloc' x'ayin yu'unique.

⁴⁵ Yu'un jech ac'o xch'unbeic li smantaltaque; ac'o spasbeic li c'usi yaloje. Ich'biluc o ta muc' stuc li Muc'ul Diose.