Salmos 104 - Bible in Tzotzil de Chenalhó with Deuterocanon

Li Diose xchabioj scotol li c'usitic spasoje

¹ Ta scotol jol co'nton ta xcalbe slequilal li Muc'ul Diose. Toj ech'em amuc'ul, Dios cu'un; ja' alapoj o ya'yel li alequilal, axojobale.

² Pixilot o ta sac osil jech chac c'u cha'al c'usi pixil ta saquil poc'; vo'ot laj alich'an jech chac c'u cha'al poc' li vinajele.

³ Laj anacan ta sba yac'ol toc li anae. Ja' acareta c'otem ya'yel li toquetique; ja' axic' c'otem ya'yel li iq'ue sventa buyuc no'ox chabat.

⁴ Ja' jpuc mantaletic avu'un li iq'uetique; ja' avajtuneltac c'otem li sacsevule.

⁵ Laj anacan lec ta snacleb li banamile yu'un jech mu me xbac'.

⁶ Li natil muc'ta nabe ja' la smuc scotol li banamile; li vo'e ja' sc'u' ic'ot ya'yel li banamile; ijelov ta sba yac'ol vitsetic li vo'etique.

⁷ Pero c'alal laj apas ta mantale, ijatovic ta anil li vo'etique; c'alal laj ya'yic li ac'op jech chac c'u cha'al chauque, la sjip sbaic batel ta anil.

⁸ Ijelovic batel ta ba vitsetic; iyalic batel ta soplejaltic; ibat staic li yavilic bu laj avalbee.

⁹ Laj avalbe ti bu no'ox c'alal xu' tsmaquique, ti mu xu' xjelovic batele, xchi'uc laj avalbe ti mu xa me smuquic yan velta li banamile.

¹⁰ Vo'ot chavac' loc'uc ya'lel li nio'etique, jech chanovic batel c'alal ta uc'umetic; chjelovic batel ta xch'ac-ch'aquil vitsetic.

¹¹ Ja' chavac'be yuch'ic li chonbolometic ta te'tique, jech mu xa'yic o taqui-o'nal li te'tical buroetique.

¹² Ja' te tspas stasic ta ti'ti' uc'um li mutetique; te luchajtic chq'uejinic ta c'obc'ob te'etic.

¹³ Vo'ot chavac'be tal ya'lel li vitsetique, te to chlic avat'es tal ti bu nacalote; ja' ta sventa avabtel ti lec xcuxet yo'nton li banamile.

¹⁴ Vo'ot chavac' ch'iuc ts'i'laletic sventa tslo'ic li chonbolometique, xchi'uc vo'ot chavac' ch'iuc c'usitic tsts'unic li cristianoetique, yu'un jech tsta o sve'elic li' ta banamil.

¹⁵ Ja' li ve'lil sventa tsta o stsatsalique, xchi'uc li ya'lel ts'usub sventa xcuxet no'ox yo'nton c'alal chuch'ique, xchi'uc li aceite sventa ch-ach'ub o lec sat yelovic yu'une, xchi'uc scotol li ve'liletic ti ch-ac'bat lec stsatsalic oe.

¹⁶ Li te'etique tsta lec ya'lelic, ja' li ch'ut te'etic te ta Líbano ti la sts'un Muc'ul Diose.

¹⁷ Ja' te ta spas stasic li mutetique; ja' te chnaquiic ta sc'obc'ob li smutal nabetique.

¹⁸ Li muc'tic vitsetique ja' snaic c'otem li te'tical tentsunetique; li ch'entique ja' sventa te chnaquiic li cotometique.

¹⁹ Li ue laj apas sventa tsbis jujun u; li c'ac'ale sna'oj li c'usi ora chch'ay batele.

²⁰ Vo'ot chavac' taluc li ic' osile, ja' li ac'ubaltique, jech chloq'uic ta xanubal li chonbolometique.

²¹ Li bic'tal leonetique xme'etic batel ta sa'el sve'elic, yu'un tsa'ic li sve'elic ac'bilic yu'un Diose.

²² C'alal chloc' c'ac'ale, ta sutic batel; ta xbat vayicuc ta xch'enic.

²³ Ja'o chloq'uic batel ta abtel ec li cristianoetique; te ch-abtejic o c'alal to ta mal c'ac'al.

²⁴ Solel mu stac' atel li c'usitic apasoje, Muc'ul Dios. Scotol le'e laj apas ta sventa abijil; li banamile noj ta sventa scotol li c'usitic apasoje.

²⁵ Te oy noxtoc li muc'ul nab ti mu stac' alel c'u sjamleje; ja' te oy scotol li chonetic ti mu stac' atel c'u yepale; te oy li biq'uitique xchi'uc li muc'tique.

²⁶ Jech noxtoc ja' te chanovic li barcoetique, xchi'uc te oy noxtoc li smuc'ta chanul nab Leviatán, sbie; laj apas sventa te chtajin ta nab.

²⁷ Scotol le'e ja' no'ox tsmalaic mac'linel avu'un ti c'alal tsta yorail chve'ique.

²⁸ C'alal chavac'be li sve'elique, ta stamic; c'alal chajam li ac'obe ta xnoj lec xch'utic.

²⁹ C'alal me chanac' asat ta stojolique, ta xlic xi'icuc; me chapojbe li ic' chich'ique, ta xchamic, ta xc'atajic ta lum yan velta.

³⁰ Pero me chavac'be li ic' avu'un sventa chcuxiique, cuxul chcomic, xchi'uc ch-ach'ub avu'un li sba banamile.

³¹ Li Muc'ul Diose sbatel osil mu xlaj o li slequilal yutsilale; xcuxet no'ox yo'nton scotol li c'usitic spasoje.

³² C'alal ta sq'uel li banamile, ta xlic nicuc; c'alal ta stij li vitsetique, ta xt'om, ta xloc' xch'ayilal.

³³ C'alal cuxulun toe, ta xiq'uejin yu'un li Muc'ul Diose; c'alal li' to oyun ta sba banamile, ta jq'uejinta li Dios cu'une.

³⁴ Ta jc'an ti ac'o lecuc yil li c'usitic ta jnope, yu'un ja' no'ox ta sventa ti ta jta xcuxetel co'ntone.

³⁵ Ac'o ulicuc ta banamil li jpasmuliletique; ac'o ch'ayicuc batel li chopol cristianoetique. Ta scotol jol co'nton ta xcalbe slequilal li Muc'ul Diose. Ich'biluc o ta muc' li Muc'ul Diose.