Salmos 103 - Bible in Tzotzil de Chenalhó with Deuterocanon

Li Diose toj lec c'usi tspas ta jtojoltic

Q'ueoj yu'un David.

¹ Ta scotol jol co'nton ta xcalbe slequilal li Muc'ul Diose; ta scotol jbec'tal ta xcalbe slequilal li xch'ul bie.

² Ta scotol jol co'nton chcalilanbe o li slequilale; mu xch'ay o ta co'nton li c'usitic lec spasojbune.

³ Ja' chispasbun perdón yu'un scotol li jmule; ja' chiscoltaun ta sventa scotol c'usiuc no'ox c'ux chca'ay.

⁴ Ja' chiscoltaun ti jech mu'yuc to chi'och ta ch'ene; ja' chiyac'bun ta jtojol li c'anel xchi'uc c'uxubinele.

⁵ Ja' chiyac'bun ta que ta jti' scotol li c'usitic leque, jech ta xiqueremaj lec yu'un jech chac c'u cha'al xic.

⁶ Li Muc'ul Diose lec tuc' ta xchapan; lec c'usi tspas ta stojol li boch'otic abul sbaic ta ilbajinele.

⁷ Laj yac' ta ilel ta stojol Moisés ti lec tuc' c'usitic tspase; laj yac' ta ilel ta stojol israeletic ti puru lequic yabtele.

⁸ Li Muc'ul Diose ja' jc'anvanej, ja' jc'uxubinvanej stuc; c'unc'un chlic sc'ac'al yo'nton, ja' toj muc' li c'uxubinel yu'une.

⁹ Mu j'ech'eluc ch-ilin o ta jtojoltic; muc teuc snac'oj o ta sbatel osil li sc'ac'al yo'ntone.

¹⁰ Mu sta jech ch-ilin ta jtojoltic jech chac c'u cha'al yepal li jmultique; mu sta jech yepal chac' jtojtic jech chac c'u cha'al yepal jchopoliltique.

¹¹ Yu'un mu'yuc spajebal chc'uxubin li boch'otic chich'ic ta muq'ue, jech chac c'u cha'al mu'yuc spajebal yiloj sbaic li vinajel xchi'uc banamile.

¹² Bats'i nom la sjip loq'uel ta stojol li jmultique, jech chac c'u cha'al nom xil sbaic li sloq'uem c'ac'al xchi'uc smaleb c'ac'ale.

¹³ Jech chac c'u cha'al totil ti c'ux ta yo'nton xnich'nabe, ja' jech ec li Muc'ul Diose c'ux ta yo'nton li boch'otic chich'ic ta muq'ue.

¹⁴ Yu'un sna'oj ti c'u x'elan pasbilutique; sna' ti lum ach'elutic no'oxe.

¹⁵ Li cristianoetique ja' jechic jech chac c'u cha'al ts'i'lal; lec chch'iic jech chac c'u cha'al nichim.

¹⁶ Pero c'alal chtal iq'ue, ta xcuchat batel, mu jna'tic bu chbat o; mu'yuc xa boch'o tsna' ti bu to'ox teq'uele.

¹⁷ Pero li c'uxubinel yu'un Muc'ul Diose sbatel osil mu'yuc spajebal o ta stojol li boch'otic chich'ic ta muq'ue. Li slequil stuq'uil yo'ntone te chcom o ta jayc'oluc alab nich'nabetic

¹⁸ Te chcom o ta sventa li boch'o ja' chch'unbeic c'usi xchapanoj Muc'ul Diose, ti mu xch'ay o ta yo'ntonic spasel c'usi chal li mantaletic yu'une.

¹⁹ Li Muc'ul Diose yac'oj lec xchotleb ta vinajel; ja' sventainoj, ja' tspas ta mantal scotol.

²⁰ Albeic slequilal Muc'ul Dios vo'oxuc li yaj'almantaloxuque ti oy avu'elic, ti lec xu' avu'unique, ti chach'unic, ti chapasic scotol li c'usitic chayalboxuque.

²¹ Albeic slequilal Muc'ul Dios acotolic vo'oxuc li yajsoldadooxuque ti te chatunic o ta stojol, ti chapasbeic c'usitic tsc'an yo'ntone.

²² Ac'o yalbeic slequilal Muc'ul Dios scotol li c'usitic pasbil yu'une, scotol ti bu c'alal sventainoje. Ta scotol jol co'nton ta xcalbe o slequilal li Muc'ul Diose.