Salmos 102 - Bible in Tzotzil de Chenalhó with Deuterocanon

Sc'opanel Dios c'alal oy vocol

Sc'opanel Dios sventa boch'o oy svocol. C'alal ep chat yo'ntone, xu' tsmal ya'lel sat ta stojol li Muc'ul Diose.

¹ Muc'ul Dios, a'ibun li jc'ope; c'otuc ta atojol li coq'uel cavanele.

² Mu me xanac' asat ta jtojol ti c'alal yorail oy jvocole; tuc'ulanbun li c'usi chacalbote. Ti c'alal yorail xivocolet ta atojole, tac'bun ta ora li jc'ope.

³ Li coraile ta xa x'ul batel jech chac c'u cha'al ch'ayil; li jbaquiltaque tstsan ya'yel jech chac c'u cha'al xupetc'oc'.

⁴ Tuch'em ya'yel li co'ntone. Tsmats' xa ya'yel jech chac c'u cha'al ts'i'lal; mu xa xchi ve'el uch' vo' chca'ay.

⁵ Ta scoj ti toj ech'em chi'oc' chi'avane, laj xa spac' sba ta jbaquiltac ya'yel li jnuculile.

⁶ Solel jtuc oyun jech chac c'u cha'al jcot xcuj ta xocol banamil, jech chac c'u cha'al jcot curutsuc ta poco' yavnaetic.

⁷ Solel mu x'och o jvayel, jech chac c'u cha'al jcot mut ti stuc luchul ta ba nae.

⁸ Yu'un mu xpajic o ta jbolc'optael li cajcontrataque; ta xchopolc'opojic ta jbi li boch'otic chopol yo'ntonic ta jtojole.

⁹ Ja' xa xq'uexol cot c'otem o li tanil c'oq'ue; li c'usi ta xcuch'e capal ta ya'lel jsat.

¹⁰ Scotol le'e ja' ta scoj li sc'ac'al avo'ntone, Muc'ul Dios; ja' ta scoj ti la'ilin ta jtojole. Laj amuq'uibtasbun ox jc'oplal, pero ts'acal laj ajipun yalel.

¹¹ Li coraile ja' jech chac c'u cha'al yaxinaltic ti chjelov no'oxe; ta xa ximats' batel jech chac c'u cha'al ts'i'lal.

¹² Pero li vo'ote, Muc'ul Dios, te oyot o sbatel osil; li abie mu xch'ay o ta alel ti jayc'ol cristianoetic chjelovic li' ta banamile.

¹³ La' me, c'uxubino xa li lum Sione, yu'un ja' xa yorail chac'uxubin, yu'un its'aqui xa li sc'ac'alile.

¹⁴ Yu'un li avajtuneltaque c'ux ta yo'ntonic li tonetic yu'unique; abul sba chilic ti puru tan xa comene.

¹⁵ Jech xu' ta xlic yich'icot ta muc' li cristianoetic ta jujun lume; ta xlic yalic alequilal li ajvaliletic ta banamile,

¹⁶ yu'un chilic ti vo'ot chacha'va'an li lum Sione, jech chvinaj batel alequilal avutsilal.

¹⁷ Yu'un chava'ibe sc'op li boch'otic abul sbaique; chatuc'ulanbe li sc'opic c'alal ta sc'anboxuc vocole.

¹⁸ Le'e ts'ibabil chcom ta vun ta sventa li ts'acal alab nich'nabetique, xchi'uc ta sventa li boch'otic ts'acal to chlic voc'anicuque yu'un jech ac'o yich'ic ta muc' ec li Muc'ul Diose.

¹⁹ Yu'un li Muc'ul Diose la sq'uel yalel tal ta toyol li banamile; la sq'uel yalel tal c'alal to ta vinajel.

²⁰ Yu'un jech cha'ibe yoq'uel li jchuqueletique; jech tscolta li boch'otic chapanbil xa'ox chich'ic milele.

²¹ Yu'un jech ac'o pucuc te ta lum Sión slequilal li Muc'ul Diose, xchi'uc ac'o albatuc slequilal te ta Jerusalén.

²² Ja' yorail jmoj chlic stsob sbaic li cristianoetic xchi'uc li ajvaliletique; jmoj chlic yich'ic ta muc' li Muc'ul Diose.

²³ Li Muc'ul Diose la spojbun jtsatsal ta o'lol be, xchi'uc la scomajesbun li coraile.

²⁴ Jech laj calbe: “Dios cu'un, mu xatuch'bun ta o'lol be li coraile, yu'un li vo'ote mu'yuc spajebal o li ajabilale”, xcut.

²⁵ Ta sliquebal ono'ox vo'ot laj aliques li banamile; ja' yabtel ac'ob li vinajele.

²⁶ Pero le'e ta ono'ox xlaj; yan li vo'ote te oyot o sbatel osil. Li c'usitic apasoje ta xpocoib jech chac c'u cha'al ta xpocoib jc'u'cutic; chajel jech chac c'u cha'al ta jel jc'u'cutic.

²⁷ Pero li vo'ote atalel te oyot o; mu sna' xlaj o avorail.

²⁸ Vo'ot chavac'be lec jun yo'ntonic li xnich'nab avajtuneltaque; te chavac' naquiicuc o ta atojol li smomnich'nab avu'untaque.