Salmos 101 - Bible in Tzotzil de Chenalhó with Deuterocanon

Li Davide laj yal ta jamal ti ja' no'ox tspas o c'usi leque

Q'ueoj yu'un David.

¹ Muc'ul Dios, li' ta jq'uejinta li c'uxubinvanej xchi'uc li c'usi tuc' ta pasele; vo'ot no'ox ta atojol ti chiq'uejine.

² Ta jc'an ja' no'ox ta jpas o li c'usi tuq'ue; jech co'nton ti ja' ta jpas o c'usi lec te ta jpasubmantale. ¿Baq'uin to chatal li' ta jtojole, Muc'ul Dios?

³ Mu jc'an xcac' jsat o ta sventa li c'usi mu'yuc tuq'ue. Chopol co'nton yu'un c'usi tspasic li boch'otic stamojic yan bee; me jutuc mu xcac' xtal xchi'inicun.

⁴ Ta jip loq'uel ta co'nton scotol li c'usitic chopol ta nopele; me jutuc mu jc'an jchi'in li boch'o chopol c'usi tspasique.

⁵ Ta jmacbe yeic li boch'otic chopol chalbeic sc'oplal xchi'ilique; mu'yuc ta jts'icbe li jtoybaetic ti muc' yac'oj sbaique.

⁶ Ja' te oy jsat ta stojol li boch'otic tuc' yo'ntonique, yu'un jech xu' ta jchi'inic ta abtel. Li boch'otic ja' tspasic c'usitic tuq'ue, ja' ta jc'an li' chtunic cu'un.

⁷ Li jlo'lavanejetique mu xcac' comicuc li' ta jna; li j'epalc'opetique mu jc'an xtal va'iicuc ta jsat.

⁸ Ta jujun c'ac'al ta xcules li' ta cosilal li boch'otic chopolique; ta jpits loq'uel li' ta lum yu'un Muc'ul Dios li boch'otic chopol c'usitic tspasique.