Salmos 100 - Bible in Tzotzil de Chenalhó with Deuterocanon

Cuxetuc no'ox co'ntontic c'alal chquich'tic ta muc' li Diose

Q'ueoj sventa yich'el ta muc' Dios.

¹ Jnaclumetic ta banamil, cuxetuc no'ox avo'nton q'uejinanic yu'un li Diose.

² Cuxetuc no'ox avo'nton tunanic yu'un li Muc'ul Diose; cuxetuc no'ox avo'nton q'uejinanic ti c'alal chatalic ta stojole.

³ C'otuc ta avo'ntonic ti ja' Dios ta melel li Muc'ul Diose. Ja' la spasutic, muc jechuc no'ox lij'ayin jtuctic; vu'utic steclumalutic, sts'unub xchij c'otemutic.

⁴ Ochanic ta ti'na sventa yamaq'uil ch'ulna, tojbeic ta vocol; ochanic te ta yamaq'uil, q'uejinanic yu'un; ich'ic ta muc', albeic slequilal.

⁵ Yu'un ja' toj lec li Muc'ul Diose, sbatel osil mu xlaj o li c'uxubinel yu'une; mu'yuc spajebal ti jun yo'nton ta jtojoltique.