Salmos 10 - Bible in Tzotzil de Chenalhó with Deuterocanon

Sc'anel coltael ta stojol Dios

¹ Muc'ul Dios, ¿c'u yu'un ti nom chavac' aba ta jtojole? ¿C'u yu'un chanac' aba ti c'alal yorail oy jvocole?

² Li boch'o chopol yo'ntone ta scoj stoyobbail chuts'inta li boch'o abul sbae, pero te no'ox pech'el chc'ot ta syoc stuquic.

³ Yu'un li boch'o chopolique ja' no'ox tstoy sbaic o ta sventa li c'usi tsnop stuquique. Li jti'-o'ntavanejetique chopol chc'opojic, tsna'leic li Muc'ul Diose.

⁴ Ta scoj toj muc' chac' sbaic li boch'otic chopolique, jech mu xac' sbaic o ta sc'ob Dios. “Altic, mu'yuc Dios”, xi no'ox tsnop ta yo'ntonic,

⁵ yu'un scotol ora lec chbat yu'unic li c'usi tspasique, pero ja' nom oy ta stojolic o li bijubtasel avu'une. Stsoq'uet no'ox yo'ntonic yu'un li yajcontraique.

⁶ Jech tsnop ta yo'ntonic: “Mu'yuc boch'o xu' chistsalun; mu boch'o xu' chiyilbun jbic'tal”, xiic.

⁷ Li yeique noj ta puru chopolc'op, noj ta epalc'op, ta lo'lavanej; ta yolon yoq'uique puru chopol, puru sbolil yo'ntonic te nac'al.

⁸ Te chbat malavanicuc ta tsobtsobnaetic; ta mucul chbat smilic li boch'o mu'yuc smule. Ja' no'ox te batem satic o ta stojol li boch'o mu sna' spoj sbae.

⁹ Ja' jechic jech chac c'u cha'al león ti snac'oj sba ta xch'ene; te tspamuc'taic tal li boch'o abul sbae, yu'un tsc'an chtal xvoch'iic ta lum. C'alal yacbil xa yu'unique, chjochic batel ta ch'ojon.

¹⁰ Ja' jechic jech chac c'u cha'al león ti chlic cotluc, ti chlic svucan lec sbae, jech chyal ta lum yu'unic ta sni'ni' yic'achic li boch'o mu sna' spoj sbae.

¹¹ Tscuyic ti te no'ox chch'ay ta yo'nton li Diose; tscuyic ti mu xa xil oe.

¹² Muc'ul Dios, la' me, ye'o ac'ob ta stojolic; mu me xach'ay ta avo'nton li boch'o oy svocole.

¹³ Dios cu'un, ¿c'u yu'un chaslabanot li boch'otic chopolique ti tsnopic ti mu'yuc chavich'be sc'opique?

¹⁴ Aviloj atuc li sbolil yo'ntonic ti toj chopole, jech chavac'be stoj, yu'un ac'o yich' yo'ntonic. Ja' chavic' ta atojol li boch'otic mu sna' spoj sbaique, vo'ot jcoltavanejot yu'un li me'onetique.

¹⁵ C'asbo sc'obic li boch'otic chopolique; lajesbo scotol xchopolilic li boch'otic chopolique. Mu me xacomtsan me jutuc.

¹⁶ Li Muc'ul Diose ja' Muc'ta Ajvalil o sbatel osil. Li boch'otic mu xich'ic ta muq'ue tsmes loq'uel ta stojol.

¹⁷ Muc'ul Dios, ja' chava'ibe sc'op li boch'otic biq'uit yac'oj sbaique, chacolta, chapatbe yo'ntonic.

¹⁸ Chapanbo svocolic li me'onetique, xchi'uc li boch'otic uts'intabilique; lajesbo sc'oplal uts'intael chaq'uic li cristianoetic ti pasbilic no'ox ta ts'u'ilume.