Salmos 1 - Bible in Tzotzil de Chenalhó with Deuterocanon

LIBRO I (Salmos 1—41 ) Sc'oplal mero xcuxetel co'ntontic

¹ Xcuxet no'ox yo'nton li boch'o mu xch'un c'usi ch-albat yu'un boch'otic chopolique, ti mu xanov ta sbe li jpasmuliletique, ti mu co'oluc c'usi tsnop xchi'uc li boch'otic tslabanic Diose,

² ti ja' no'ox oy ta yo'nton o li smantaltac Muc'ul Diose, ti ja' tsnopilan o ta yo'nton ta c'ac'al ta ac'ubale.

³ Li boch'o jech yo'ntone ja' co'ol jech chac c'u cha'al jpets te' ts'unbil ta ti' uc'um, ti lec chac' sat c'alal yorail tsatine, ti mu xlilij li yanale. Scotol li c'usi tspase lec chbat yu'un scotol.

⁴ Yan li boch'otic chopolique mu jechuc; ja' co'olic jech chac c'u cha'al solil trigo ti chcuchat batel ta iq'ue.

⁵ Ja' yu'un li boch'otic chopolique mu xcuch yu'unic ti c'alal oy chapanele; li jpasmuliletique mu xu' jmoj chc'otic xchi'uc li boch'otic lequique.

⁶ Yu'un li Muc'ul Diose te oy sat ta sbe xaneb li boch'otic lequique; yan li boch'otic chopolique ja' no'ox sventa ch'ayel li be stamojique.