Rut 4 - Bible in Tzotzil de Chenalhó with Deuterocanon

Laj yic' sbaic xchi'uc Rut li Booze

¹ Ta yan c'ac'al li Booze bat chotluc ta ochebal yu'un li lume. Ta jliquel te ijelov li vinic ti laj yalbe sc'oplal ti ja' bats'i yuts' yalal sba xchi'uc li Rute. Li Booze jech laj yalbe: —Quits'in, la' chotlan li'i —xut. Jech te ital chotluc.

² Li Booze ta ora la stac ta iq'uel lajuneb banquilaletic te ta lum; laj yalbe ti ac'o chotiicuc eq'ue jech te ivul chotiicuc.

³ Li Booze jech lic yalbe li yuts' yalal te chotole: —Li Noemí ti isut tal ta yosilal Moabe, tsc'an chchonbe li spuculal osil anima cuts' calaltic Elimeleque.

⁴ Ja' ta jc'an chana', yu'un xu' chanop me vo'ot chaman. Xu' chapas ta ora li' ta stojol li testigoetic li'i, xchi'uc ta stojol li banquilaletic li' ta lume. Yu'un vo'ot bats'i avuts' avalal aba achi'uc li cuts' calaltic Elimeleque, jech vo'ot oy ta aventa chaman. Pero me mu xac'an xamane, albun ca'ay, yu'un vu'un oy ta jventa xu' ta jman ec —xut. Itac'ov li vinique: —Xu' ta jman —xi.

⁵ Li Booze lic yalbe lec ta jamal: —Na'o me, me laj amanbe yosil li Noemie, tsc'an chavic' noxtoc li Rute, ja' li me'on ants liquem tal ta Moabe, yu'un jech mu x'ul o sts'unubal li anima cuts' calaltique —xut.

⁶ Itac'ov li vinique: —Me jeche, mu xu' cu'un ta jman, yu'un naca me socuc o sc'oplal li jpuculal osile. Ja' lec vo'ot xaman me xu' avu'une; vo'ot xacom ta jq'uexol, yu'un mu xu' cu'un li vu'une —xi.

⁷ C'alal jech ic'ot ta pasele, ja'o yorail oy c'usi stalel tspasic li israeletique. C'alal me oy boch'o chac' ta yan li c'usi sc'oplal ja' tspas stuque, o me tsoques c'usi xchapanoj, me oy c'usi chchon, o me tsmane, chich' loc'bel jun xonob; ja' chich' ac'bel li yane. Ja' jech svinajeb yu'unic li israeletique.

⁸ Li vinique lic sloc' jun xonob, jech laj yalbe li Booze: —Ich'o li jxonobe; ja' lec vo'ot xaman o li osile —xut.

⁹ Li Booze jech laj yalbe li banquilaletique xchi'uc li boch'otic te oyique: —Vo'oxuc testigooxuc cu'un ti li' ta jmanbe Noemí li yosil Elimelec, Quelión, xchi'uc Mahlone,

¹⁰ xchi'uc ti li' chquic' li Rute, ja' li me'on ants liquem tal ta Moabe, yu'un jech li' oy o sbi ta yosil li Mahlone, ja' li anima smalale. Jech mu xtu'p o sts'unubal li' ta jtojoltic li Mahlone, xchi'uc jech mu xch'ay o ta alel li' ta jlumaltic. Ja' yu'un vo'oxuc testigo chacomic cu'un —xut.

¹¹ Li banquilaletique xchi'uc li boch'otic te oyique jech laj yalic: —Lec oy, vu'un testigo chicomcutic. Li Muc'ul Diose ac'o yac' ti xu' chavic' li Rute; ac'o comuc jech chac c'u cha'al Raquel xchi'uc Lea ti ja' la sliquesic sts'unubal li Israele. Vo'ot lec ich'bil ta muc' chacom li' ta Efrata, xchi'uc oy lec ac'oplal chcom li' ta Belén.

¹² Muc'ul Dios chayac'bot ep anich'nab ta sventa li ants le'e. Ac'o boluc ep avalab anich'nab jech chac c'u cha'al yalab xnich'nab li Fares, ja' li yol xnich'onic Tamar xchi'uc Judae —xiic.

¹³ Jech li Booze laj yic' o li Rute; lic xchi'in sbaic. Li Muc'ul Diose laj yac' ti ac'o nabuc xch'ute, jech ivoc' jun squeremic.

¹⁴ Li antsetique jech laj yalbeic li Noemie: —Ich'biluc ta muc' li Muc'ul Diose, yu'un laj xa yac'bot ayal'ol, yu'un jech xu' chaxchi'inot. Toj lec ti oyuc c'uxi muc' sc'oplal chbat li' ta stojol israeletic li ayal'ole.

¹⁵ Ja' chaspatbot avo'nton xchi'uc chascoltaot ti c'alal me'elot xae. Yu'un ja' yol avalib ti lec sc'anojote, ti toj ven bal laj ava'ay jech chac c'u cha'al vucub queremetique —xutic.

¹⁶ Li Noemie la spet li olole; ja' la sts'ites o.

¹⁷ Li antsetic ti nopol nacalic xchi'uc Noemie jech laj yalic: —Ivoc' xa jun squerem li Noemie —xiic. Obed laj yac'beic sbi li quereme. Li Obede ja' stot li Isaie; ja' smoltot li Davide.

Sc'oplal smoltotac David

¹⁸ Li'i ja' sc'oplal smomnich'nabtac Fares: Li Farese inich'naj, Hezrón sbi.

¹⁹ Li Hezrone inich'naj, Ram sbi. Li Rame inich'naj, Aminadab sbi.

²⁰ Li Aminadabe inich'naj, Naasón sbi. Li Naasone inich'naj, Salmón sbi.

²¹ Li Salmone inich'naj, Booz sbi. Li Booze inich'naj, Obed sbi.

²² Li Obede inich'naj, Isaí sbi. Li Isaie inich'naj, ja' li Davide.