Rut 3 - Bible in Tzotzil de Chenalhó with Deuterocanon

Ic'uxubinat yu'un Booz li Rute

¹ Li Noemie jech laj yalbe li Rute: —Tseb, ta jc'an ta jsa'bot lec anail yu'un jech xcuxet no'ox avo'nton.

² Q'uelavil, li cuts' calal Booze, ja' li boch'o laj xa achi'inbe ta abtel squiarataque, ta ac'ubaltic tanae te chbat ta smajubil strigo yu'un chbat sq'uel lec li strigoe.

³ Ja' lec atinan; ac'o lec aperfume. Ja' lapo ti bu toj ven lec ac'u'e; batan te yo' bu oy li Booze. Pero mu to me xavac' aba ta ilel ti me mu'yuc to lajem yo'nton ta ve'el, ta yuch'el vo'e.

⁴ Q'uelo lec ti bu chvaye. Ts'acal c'unc'un xbat ajolbe yacan; te xamochi. Ts'acal te chlic yalbot stuc c'usi xu' chapas —xut.

⁵ Itac'ov li Rute: —Lec oy, ta jpas li c'usi chavalbune —xi.

⁶ Li Rute ibat ta smajubil trigo; la spas jech chac c'u cha'al i'albat yu'un li sme'el'alibe.

⁷ Li Booze te ive' laj yuch' vo', toj xcuxet yo'nton. Ts'acal ibat vayuc ta sts'el yo' bu busul li strigoe. Li Rute ta c'unc'un ital sjolbe yacan; te imochi.

⁸ Ta o'lol ac'ubal ijoyij svayel li Booze. Ijoyij, ja' to laj yil ti oy jun ants te mochol ta yacane.

⁹ Jech la sjac'be: —¿Boch'oot? —xut. Itac'ov li Rute: —Vu'un Rutun. Ac'bun tal jutuc yoc axaquita ec, yu'un cuts' calal jbatic —xut.

¹⁰ —Ac'o yac'bot bendición li Muc'ul Diose, tseb. Ta to xavac' lec ta ilel c'u x'elan slequil avo'nton ta jtojol le' to batel, jech chac c'u cha'al slequil avo'nton ta stojol li anima amalale. Ti jechuque, ja' laj at'uj jun vinic ti xjelov to squeremal jech c'u cha'al vu'une, me jc'ulej, o me me'on. Pero muc jechuc xapas.

¹¹ Mu xavat avo'nton, tseb. Scotol li jchi'iltac li' ta lume sna'ic ti ta melel lequil antsote, jech ta jpas li c'usi laj ac'anbune.

¹² Ta melel mero cuts' calal jbatic. Pero oy yan ti ja' bats'i avuts' avalale.

¹³ Lec oy, vayan to li'i. Oc'om chca'itic me tsc'an tspas c'usi oy ta sventa xu' tspas ta atojol li boch'o bats'i avuts' avalale. Yan me mu sc'ane, ta xcalbot ta jamal ta stojol Muc'ul Dios ti vu'un xu' ta jpase. Ja' lec vayan to; jmalatic sacub —xut.

¹⁴ Jech te ivay ta yacan li Booze. Ta yoc'omal sob ilic; ja'o ilic ti c'alal mu to xcotquin lec jbatique. Yu'un li Booze jech laj yal: “Tsc'an mu boch'o sna' ti oy i'ay ants li' ta smajubil jtrigoe”, xi.

¹⁵ Li Booze jech laj yalbe li Rute: —Loc'o li anatil c'u'e; lich'o tal —xut. C'alal la xlich' lec sc'u' li Rute, li Booze la sbisbe batel ech'em ta cha'vinic (40) kilo cebada. La scajanbe batel ta snecub, jech ibat ta lum li Rute.

¹⁶ C'alal ic'ot yo' bu oy li sme'el'alibe, jech ijac'bat yu'un li sme'el'alibe: —Tseb, ¿c'u x'elan ibat avu'un li c'usi laj apase? —xut. Jech te lic xcholbe scotol c'usi i'albat yu'un li vinique.

¹⁷ Jech to laj yal: —Li' laj yac'bun tal cebada, jech laj yalbun: “Mu xu' jeche' xmeymun ac'ob chasut ta stojol li ame'el'alibe”, xiyutun —xut.

¹⁸ Jech laj yal li Noemie: —Lec oy, jmalatic c'usi chc'ot ta pasel. Li vinic le'e mu sna' te no'ox chlaj yo'nton, ja' to me ichapaj yu'un scotole —xut.