Rut 1 - Bible in Tzotzil de Chenalhó with Deuterocanon

Sc'oplal Rut xchi'uc Noemí

¹ C'alal ja'o yorail oy jchapanvanejetic yu'un li israeletique, ja'o ital tsots vi'nal. Oy jun vinic te ta Belén ta yosilal Judá, ibat nacluc ta yosilal Moab xchi'uc yajnil xchi'uc chib xnich'on.

² Li vinique ja' Elimelec sbi. Li yajnile ja' Noemí sbi. Yan li xnich'nabe ja' Mahlón xchi'uc Quelión sbiic. Ja' efrataetic, liquemic ta Belén ta yosilal Judá. C'alal ic'otic ta Moabe, te inaquiic o.

³ Li Elimeleque icham. Li Noemie ja' xa no'ox icom xchi'uc li chib yole.

⁴ Ta yan c'ac'al la sa' yajnil li queremetique; ja' Moab tsebetic. Orfa sbi li sbae; li yane Rut sbi. C'alal iloc' lajuneb jabile,

⁵ ja'o ichamic ec li Mahlón xchi'uc Quelione, jech li Noemie solel stuc xa icom; mu'yuc xa yalab, xchi'uc mu'yuc xa smalal.

⁶ Li Noemie laj ya'ay a'yej te ta Moab ti laj xa xc'uxubin xnich'nab te ta Belén li Muc'ul Diose; laj xa yac'be sve'elic.

⁷ Ja' yu'un li Noemie la snop tsut batel ta Judá xchi'uc li yalibtaque. Jech iloq'uic batel ti bu to'ox nacalique; ibatic ta Judá.

⁸ Li Noemie jech laj yalbe li yalibtaque: —Xu' chasutic batel ta sna atot ame'ic li jujunoxuque. Ac'o xc'uxubinoxuc Muc'ul Dios jech chac c'u cha'al laj ac'uxubinicun jchi'uc li jqueremetique.

⁹ Muc'ul Dios chac' nupinanic yan velta, yu'un jech xcuxet no'ox avo'ntonic achi'uc amalalic ta anaic —xut. Li Noemie lic sts'uts'an li yalibtaque yu'un xa tsvoc' sbaic o. Pero li stuquique lic oq'uicuc.

¹⁰ Jech laj yalbe li sme'el'alibique: —Mu'yuc chisutcutic batel; ta jchi'inotcutic batel c'alal ta avosilal —xutic.

¹¹ Li Noemie jech to laj yalbe: —Tsebetic, ja' lec sutanic batel. Altic ti chbat achi'inicune yu'un mu'yuc xa yan jqueremetic chcac' nupinan achi'uquic.

¹² Ja' lec sutanic batel ta anaic, yu'un li vu'une me'elun xa; mu xa ximalij. Ac'o me chimalij, ac'o me oy xa jmalal chivay tana, xu' chvoc' to yan jqueremetic,

¹³ pero ¿me yu'un chamalaic to chch'iic, tstaic vinical yo' xu' chlic amalinique? ¿Me yu'un xu' avu'unic ti te xava'lajetic o chamalaique? Tsebetic, mu xu'. Li Muc'ul Diose laj yac'bun tsots jvocol. Pero yo'to tstsatsub jvocol c'alal me chquil ep avocolic ec li vo'oxuque —xut.

¹⁴ Li tsebetique i'oq'uic yan velta. Li Orfae la sts'uts' comel li sme'el'alibe, jech isut o batel. Pero li Rute te icom xchi'in li sme'el'alibe.

¹⁵ Li Noemie jech laj yalbe li Rute: —Q'uelavil, li avit'ixe isut xa batel ta slumal, bat yich' ta muc' yan velta li sdiosique. Ja' lec sutan batel ec li vo'ote —xut.

¹⁶ Itac'ov li Rute: —Mu xatacun sutel, yu'un ta jc'an chbat jchi'inot. Ti bu chabate, te chibat ec; ti bu chanaquie, te chinaqui ec. Li achi'iltac ta alumale ja' jchi'iltac chc'ot ec; li Dios avu'une ja' Dios cu'un ec.

¹⁷ Te ac'o chamcun ec ti bu chachame; te ac'o quich' muquel noxtoc. Me ta jvoc' jba batele, ac'o yac'bun jtoj li Muc'ul Diose. Yan me ta scoj yu'un lijcham ti ta jvoc' jbatique, mu xa c'u xcutic obi —xi.

¹⁸ C'alal laj yil Noemí ti solel scotol yo'nton tsc'an chbat li yalibe, mu'yuc xa c'usi laj yalbe.

¹⁹ Jech te ibatic xchibalic; te ic'otic ta Belén. C'alal ic'otic ta Belene, li yajvaltac lume labal laj ya'yic. Jech laj yalic li antsetique: —¿Me mu ja'uc Noemí le'e? —xiic.

²⁰ Li Noemie jech laj yal: —Mu xa xavalbicun Noemí. Mara xavalbicun, yu'un li Dios ti ech'em svu'ele tsots laj yac'bun jvocol.

²¹ C'alal liloc' batel li'i, noj sbel jc'ob. Pero xocol xa jc'ob lisut tal, yu'un jech la sc'an li Muc'ul Diose. Mu xa smeloluc chavalbicun Noemí, yu'un li Muc'ul Dios ti ech'em svu'ele laj xa yac'bun ep jvocol —xi.

²² Ja' jech isut tal li Noemie xchi'uc li yalib Rute, ja' li Moab antse. Ja' la scomtsanic o li yosilal moabetique; te ic'otic ta Belén ta yorail chich' tuch'el cebada.