Romanos 12 - Bible in Tzotzil de Chenalhó with Deuterocanon

C'usi tsc'an tspas jch'unolajeletic

¹ Ja' yu'un quermanotac, ta sventa ti ep la xc'uxubinoxuc li Diose, ta jc'anboxuc vocol ta atojolic ti ac'o avac'beic sventain o abec'talique, yu'un jech ja' cuxul matanal chc'ot, ja' ch'ul matanal; toj lec xcuxet yo'nton yu'un li Diose. Ja' jech li mero yich'el ta muc' Dios tsc'an chapasique.

² Mu me xachanbeic stalel li cristianoetic li' ta banamile. Ja' tsc'an chjel batel atalelic li vo'oxuque, jech ch-ach'ub batel li c'usi chanopique, jech chlic avotquinic batel c'usi tsc'an li Diose, ja' li c'usitic lec chile, li c'usitic tuq'ue.

³ Ta sventa ti yac'ojbun cabtel ta yutsil yo'nton li Diose, ja' yu'un jech chacalboxuc ta acotolic. Mu me boch'o toj muc' spas sba avu'unic. Ja' tsc'an chanopic lec jujunoxuc c'usi amotonic ac'biloxuc yu'un Dios ta sventa ti ach'unojique.

⁴ Q'uelo avilic c'u x'elan li jbec'taltique; ep ta chop stsacoj sba, pero mu jchopuc no'ox yabtel scotolic.

⁵ Ja' no'ox jechutic ec li vu'utique, eputic, pero jun no'ox jbec'taltic c'otem ta stojol li Cristoe. Jchi'il jbatic, jtsacoj jbatic ta jcotoltic.

⁶ Pero yantic o c'usi xu' cu'untic ec li jujunutique, ja' ti c'usi jbijiltic laj yac'butic ta slequil yo'nton jujunutique. Ja' yu'un, me ja' amoton yu'un Dios chaval c'usi tsc'ane, ja' me xaval ti c'u yepal xu' avu'un ta sventa xch'unojel avo'ntone.

⁷ Me ja' amoton yu'un Dios chacoltavan ta c'usiuc no'ox abtelale, coltavanan me. Me ja' amoton yu'un Dios chachanubtasvane, chanubtasvanan me.

⁸ Me ja' amoton yu'un Dios chatsatsubtasbe yo'nton yane, paso me. Me ja' amoton yu'un Dios chaq'uelan c'usi oy avu'une, yutsiluc me avo'nton xapas. Me ja' amoton yu'un Dios chaliques lo'ile, scotoluc me avo'nton xapas. Me ja' amoton yu'un Dios ti c'ux ta avo'nton achi'ile, cuxetuc no'ox me avo'nton xapas.

⁹ C'anvananic me ta melel; mu me xacuy no'ox abaic. Contrainic li c'usitic chopole; ja' ac'o avo'ntonic spasel li c'usitic leque.

¹⁰ Talbat xac'an abaic ta sventa ti co'ol ach'unojique. Talbat chavich' abaic ta muc'.

¹¹ Aq'uic persa spasel c'usi tsc'an li Cajvaltique; mu me xach'ajubic. Staojuc me yav avo'ntonic, tunanic o yu'un li Cajvaltique.

¹² Cuxetuc no'ox avo'ntonic ta sventa ti oy c'usi amala-malaique. Me oy avocolique, oyuc stsatsal avo'ntonic; c'opanic Dios scotol ora.

¹³ Coltaic me li yu'untac Dios ti mu'yuc c'usi chtun yu'unique. Iq'uic ochel li boch'o chc'ot xch'aman anaique.

Tsc'an ta jc'uxubintic boch'o chiscontrainutic

¹⁴ C'anbeic bendición li boch'o chascontrainoxuque. C'anbeic slequilalic; mu xac'anbeic slajel xchamelic.

¹⁵ Cuxetuc avo'nton achi'uquic li boch'o xcuxet yo'ntone; oc'an achi'uquic li boch'o ch-oq'uique.

¹⁶ Co'oluc me avo'nton acotolic. Mu me boch'o muc' spas sba avu'unic. Co'ol biq'uit xava'ay aba ta acotolic. Mu me boch'o toj bij scuy sba avu'unic.

¹⁷ Mu me chopoluc spacol xavac'beic li boch'o chopol c'usi chaspasboxuque. Aq'uic persa spasel c'usi lec ta stojol scotol cristianoetic.

¹⁸ Li c'usi oy ta aventaic ti me xu'e, ja' ti ac'o avaq'uic persa ti mu'yucuc c'op avu'unic achi'uquic scotol cristianoetique.

¹⁹ Vo'oxuc ti lec jc'anojoxuque, mu me xapac ac'oplal atuquic. Ja' ac'beic spac sutel stuc li Diose. Yu'un jech ts'ibabil ta sc'op Dios: “Vu'un oy ta jventa ta xcac'be spacol; vu'un jtuc ta xcac'be stoj”, xi li Cajvaltic Diose.

²⁰ Yu'un jech ts'ibabil: “Me chvi'naj li avajcontrae, ac'bo sve'el. Me taquin yo'ntone, ac'bo vo' yuch'. Me jech chapase, te chlic q'uexovuc avu'un”, xi ts'ibabil.

²¹ Mu me ja'uc xastsaloxuc li c'usi chopole. Ja' tsalic ta sventa c'usi lec li c'usi chopole.