Proverbios 9 - Bible in Tzotzil de Chenalhó with Deuterocanon

Li bijubtasel xchi'uc jboliltique mu co'oluc c'usi ta jtatic yu'un

¹ Li bijubtasele la sva'an sna; laj yaanbe vucbej yoyal.

² Ts'acal la smil sts'unub yovol ta sventa q'uin; la xchapan lec ya'lel ts'usub te ta xmexa.

³ La stac batel li squiarataque. Li bijubtasele i'avan ta toyol vits te ta lum.

⁴ Jech laj yal: “Vo'oxuc ti mu'yuc abijilique, li' xatalique. Vo'oxuc ti mu c'usi xana'ique,

⁵ la' ve'anic li pan cu'une; la' uch'anic li ya'lel ts'usub li' chapanbil cu'une.

⁶ Comtsanic li sbolil avo'ntonique jech chacuxiic; ja' sa'ic li chanubtasele”, xi.

⁷ Li boch'o ta spajes jlabanvaneje ja' no'ox ta sta chopolc'optael; li boch'o ta staq'ui chopol vinique ja' no'ox ta sta contrainel.

⁸ Mu xavulilan li jlabanvaneje, yu'un jech mu xascontrainot; yan me chacolta li boch'o bije, ja' lec chayilot.

⁹ Bijubtaso li boch'o xa'ibe ono'ox smelole, jech ech'em to ta xbijub; chanubtaso lec li boch'o tuc' yo'ntone, jech ta to xtojob batel.

¹⁰ Me chquich'tic ta muc' li Muc'ul Diose, ja' to te chlic bijubcutic batel; me chcotquintic batel li Muc'ul Diose, ta xjam lec jsatic.

¹¹ Vu'un li bijililune, vu'un ta jventa chnatub avorail, jech ep jabil chacuxi.

¹² Me oy lec abijile, ja' alequilal atuc; me jlabanvanejot no'oxe, chatoj atuc.

¹³ Li bol talelale ja' jech chac c'u cha'al jun ants ti mu xmac ye ta lo'ile, ti mu spajes sbae, ti mu xich'be smelole,

¹⁴ ti chchoti ta xila te ta sti' snae, ti chchoti bu toyol jutuc vits te ta lume,

¹⁵ ti ta xic' li boch'otic te chjelovique, li boch'otic chanovic batel ta tuq'uil bee.

¹⁶ Jech ta xalbe: “Vo'oxuc ti mu'yuc abijilique, li' xatalique”, xut. Xchi'uc jech chalbe noxtoc li boch'otic mu'yuc c'usi sna'ique:

¹⁷ “Li elc'anbil vo'e toj lec chi' ta uch'el; li ve'lil ti mucul ta jve'tique toj lec mu”, xut.

¹⁸ Li boch'otic chbatique mu sna'ic me te chchamic o; mu sna'ic me ta yavil animaetic xa chbatic li boch'otic chch'unic iq'uele.