Proverbios 8 - Bible in Tzotzil de Chenalhó with Deuterocanon

Li bijubel ta sventa Diose toj lec, mu xlaj o sc'oplal

¹ Li bijubtasele ta x'avan; li tojobtasele tsots xc'opoj.

² Te ta xac' sba ta toyol stsel-lejtic ta nopol be; ta sva'an sba ta curusal be.

³ Te ta xc'opoj ta ti'ti' na; tsots ch-avan ta yochebal lum, jech ta xal:

⁴ “Viniquetic, chajc'opanoxuc; cristianoetic, chajchi'inoxuc tal ta lo'il.

⁵ Bol cristianoetic, ja' c'anic li tuq'uibtasele; vo'oxuc ti mu'yuc abijilique, ja' sa'ic li tojobtasele.

⁶ A'yo ava'yic, yu'un ta xcal tal li c'usi stuc xa no'ox toj leque; ta jlo'ilta tal li c'usi tuq'ue.

⁷ Ja' ta xcal li c'usi melele; mu ja'uc chcal li c'usi chopole.

⁸ Puru tuc' li c'usi chloc' ta quee; mu'yuc capal ta bol lo'il xchi'uc ta epalc'op.

⁹ Toj lec cha'yic li boch'o cha'ibeic smelole; lec tuc' cha'ay li boch'o oy sbijile.

¹⁰ Ja' c'anic li chanubtasel cu'une, yu'un ja' mu tsotsuc sc'oplal li saquil taq'uine; ja' sa'ic li bijubtasel cu'une, yu'un ja' mu tsotsuc sc'oplal li c'anal taq'uine”, xi.

¹¹ Ja' xjelov to slequil li bijubtasele, ja' mu sta jech li lequil tonetique; mu xco'laj xchi'uc li c'usitic toj c'upilic sba chquiltique.

¹² “Vu'un li bijililune li' jchi'uc scotol li bijubtasele; li' oy cu'un scotol li lequil tojobtasele.

¹³ Li boch'o chich' ta muc' Muc'ul Diose ja' xa tscontrain o li c'usi chopole. Li vu'une contra chquil li toybaile, li boch'o toj muc' yac'oj sba, li c'usitic yan chopole, xchi'uc li epalc'ope.

¹⁴ Vu'un li' oy ta jtojol li lequil chanubtasel xchi'uc lequil tojobtasele; vu'un li bijililune, vu'un li tsatsalilune.

¹⁵ Vu'un ta jventa xu' yu'un tspasic mantal li ajvaliletique; vu'un ta jventa xu' yu'un chalic c'u x'elan chcom li boch'otic chchapanique.

¹⁶ Vu'un ta jventa xu' yu'unic li banquilaletique; vu'un ta jventa xu' yu'un chchapanvanic li ajvaliletique.

¹⁷ Lec c'ux ta co'nton li boch'o chisc'anune; li boch'o chisa'une chistaun.

¹⁸ Vu'un oy ta jventa li c'ulejalil xchi'uc li ich'el ta muq'ue, ja' li c'ulejalil li ich'el ta muc' ti mu xlaj sc'oplale.

¹⁹ Li c'usi chcaq'ue ja' xjelov to slequil, ja' mu sta jech slequil li c'anal taq'uin ti lecubtasbil xae; li c'usi ta jq'uelane ja' xjelov to slequil jech chac c'u cha'al li bats'i saquil taq'uine.

²⁰ Vu'un chituq'uibtasvan batel ta sbelal c'usi tuc' xchi'uc ta sbelal c'usi lec.

²¹ Yu'un jech xu' tstaic c'usi sc'oplal chich'ic li boch'o chisc'anicune, jech ta xcac'be ep sc'ulejalic.

²² “Li Muc'ul Diose vu'un ba'yuc laj yac'un; vo'one xa ono'ox te oyun ti c'alal la spas c'usitic oye.

²³ Te xa ono'ox oyun ti c'alal mu'yuc to'ox pasbil li banamile.

²⁴ Voq'uemun xa'ox ti c'alal mu'yuc to'ox li muc'tic nabetique, ti c'alal mu'yuc to'ox cht'oman loq'uel li nio'etic xchi'uc li uc'umetique,

²⁵ ti c'alal mu'yuc to'ox pasbil li vitsetique, xchi'uc ti c'alal mu'yuc to'ox pasbil li stsel-lejtique te ono'ox oyun.

²⁶ Li osil banamile mu'yuc to'ox pasbil; me ja'uc li pucuc ti pasbil o li banamile, mu'yuc to'ox c'usi oy o.

²⁷ Te ono'ox oyun o ti c'alal laj yich' pasel li vinajele, xchi'uc c'alal laj yich' setanel ta joyob li yibel vinajele,

²⁸ xchi'uc ti c'alal laj yich' nacanel ta toyol li vinajele, xchi'uc ti c'alal la snacan lec natiquil nab li Diose,

²⁹ xchi'uc c'alal laj yalbe lec mantal nabetic ti mu me xjelovic ti bu albilic chpajique, xchi'uc ti c'alal mu'yuc to'ox pasbil snacleb li banamile.

³⁰ Te ono'ox oyun o ta sts'el Dios scotol c'ac'al. Vu'un xcuxetelun yo'nton scotol ora; scotol c'ac'al xcuxet co'nton ta stojol.

³¹ Toj xcuxet no'ox co'nton ti bu oy jnaclumetic ta spasbil banamile; toj jun co'nton ta stojol li cristianoetique.

³² “A'yo ava'yic, jnich'nab, toj xcuxet no'ox yo'nton li boch'otic chtalic ta be cu'une.

³³ A'yo lec ava'yic li chanubtasele jech chabijubic; mu me xabajic li tojobtasele.

³⁴ Toj xcuxet no'ox yo'nton li boch'o cha'ay c'usi chcale, ti te oy satic scotol c'ac'al ta sti' jnae, ti scotol ora te chismalaicun oe.

³⁵ Yu'un li boch'o chistaune ta sta xcuxlejal, xchi'uc lec ch-ilat yu'un li Muc'ul Diose.

³⁶ Yan li boch'o tsa' smul ta jtojole ta sa' svocol stuc; li boch'o chisbajune yu'un xa ja' tsc'an o li lajele”, xi.