Proverbios 7 - Bible in Tzotzil de Chenalhó with Deuterocanon

Toj manya c'u x'elan chlo'lavan li jmulavil antse

¹ Jnich'on, ch'uno me li mantaletic laj calbote; comtsano lec ta ajol li chanubtaseletic cu'une.

² Paso c'usi chal li jmantaltaque jech lec chabat; tsotsuc sc'oplal chava'ay jech chac c'u cha'al tsots sc'oplal chava'ay chachabi yuninal asate.

³ Te xojoluc o ta sbic'tal ac'ob; ts'ibao lec ta yut avo'nton.

⁴ Li bijubtasele cuyo jech chac c'u cha'al avix; li tojobtasele c'ano jech chac c'u cha'al jun achi'il ti lec ac'anoje.

⁵ Yu'un ja' chascoltaot ta sventa li jmulavil antse, ta sventa li ch'ayemal ants ti lec sna' xlo'lavane.

⁶ Oy jun velta nach'alun ta sventanail jna; te ta jq'uel loq'uel osil ta xchajchajtaq'uinal li jventanae.

⁷ Te laj quil oy ep queremetic, pero oy jun laj quil ti solel mu'yuc sbijile; mu j'ech'el sna' snopel.

⁸ Te ijelov ta chiquin xoral, te ech' sbas li xorale, te tuc' ibat ta sna li antse;

⁹ ja'o bat xa'ox c'ac'al, ta xa'ox x'ic'um osil.

¹⁰ Te ital nupatuc yu'un li antse. Solel lec smeltsanoj sba loq'uel tal jech chac c'u cha'al li jmulavil antsetique; bats'i lo'lavanej oy ta yo'nton.

¹¹ Lec sna' c'u x'elan tstij boch'ouc no'ox tsta; mu xnaqui o ta sna.

¹² Xva'vun no'ox ta xoraltic, xva'vun no'ox ta ch'ivit; tsmaquilan ta be li boch'otic chjelovique.

¹³ Li antse bat snop li quereme, la smey, la sts'uts'; solel mu xq'uexov, solel mu'yuc q'uexlal cha'ay, jech laj yalbe:

¹⁴ “Vu'une, cac'oj milbil matanal ta sventa lec chiyilun Dios; li' ta orae ic'ot xa ta pasel cu'un li c'usi caloj ta stojol Diose.

¹⁵ Ja' yu'un li' tal jnupot ta be, yu'un toj chac jq'uel ca'ay asat, pero li' xa la jtaote.

¹⁶ Lec xa jmeltsanoj comel li jvayabe; lec jq'uioj comel pimil xaquita pasbil ta lino no liquem tal ta Egipto.

¹⁷ Cac'ojbe xa lec smuil poxilal, ja' mirra, áloe, xchi'uc canela.

¹⁸ Batic, ba jloq'ues lec co'ntontic ca'tic ta sc'upinel jbatic ti bu xa c'alal xu' cu'untique; jaxtic lec co'ntontic ca'tic c'alal to tsacub oc'om.

¹⁹ Yu'un li jmalale mu'yuc te oy ta jnacutic; nom bu batem.

²⁰ Lec jun vorxa yich'oj batel li jtaq'uincutique; ja' to tsut tal ta yan u”, xut.

²¹ Ta scoj ti toj lec ya'yel li c'usitic laj yalilane, ta scoj ti toj jun yutsil ya'yel li slo'ile, te ipich'aj yo'nton yu'un.

²² Ta ora no'ox nabal ibat ta spat jech chac c'u cha'al xna'pnun xa batel ta nitel jcot vacax sventa chbat yich' milel, jech chac c'u cha'al jcot te'tical chij ti mu sna' me lich'anbil xa ch'ojon ta sbee.

²³ Mu sna' me lec chpajbat ochel flecha ta yo'nton jech chac c'u cha'al jcot mut ti chbat stic' sba ta yoquil ta ora no'oxe; mu sna' me te xa chcham o.

²⁴ Ja' yu'un, jnich'on, a'yo me ava'ay lec; tuc'ulano lec ava'ay li c'usi chacalbote.

²⁵ Mu me xavac' ta avo'nton c'usitic chal li chopol antse; mu me xana'pnunuc xa batel.

²⁶ Yu'un ep xa boch'o staoj svocol o jech; ac'o me lec tsatsal viniquetic, ep xa te ichamic o.

²⁷ Yu'un li snae ja' sbelal yavil animaetic; ja' xa yavil lajebal.