Proverbios 6 - Bible in Tzotzil de Chenalhó with Deuterocanon

Taq'uiel ta sventa boch'o tstic' sba ta spojel j'iluvil

¹ Jnich'on, me oy chava'an aba ta piarol yu'un li boch'o lec xac'opan aba achi'uque, o me oy chavac' ave ta sventa boch'ouc no'oxe,

² laj xa achuc aba o ta scoj li avee; te xa tiq'uil lacom o ta scoj li c'usi laj avale.

³ Jnich'on, ti c'u x'elan xu' chacolta aba ta ora ta sventa ti laj xa achuc aba ta stojol achi'ile, ja' jech xapas chac li'i: Batan, bat bic'tajeso aba, c'anbo vocol; coltao aba loq'uel ta sventa li c'usi laj avale.

⁴ Mu me teuc no'ox ch'an xachi; mu me teuc no'ox x'och avayel.

⁵ Jatovan loq'uel ta anil jech chac c'u cha'al te'tical chij c'alal chich' nutsele; coltao aba loq'uel jech chac c'u cha'al jcot mut c'alal chich' yaquele.

Taq'uiel ta sventa boch'otic ch'ajic

⁶ Jaracan, ch'ajil vinic, q'uelo lec avil li xinichetique; otquino lec avil li c'usitic tspasique, jech xu' oy c'usi chachan te.

⁷ Li stuquique mu'yuc jpasmantal, mu'yuc ajvalil yu'unic, mu'yuc boch'o ch-albatic li c'usi tspasique.

⁸ Pero lec sna' stsob sve'elic ta yorail q'uepelaltic; lec sna' stsob c'usi tstunic ti c'alal yorail c'aoje.

⁹ ¡Ch'ajil vinic, ta'lo xa li vayele! ¡Ta'lo xa li mochleje!

¹⁰ Yu'un c'alal chavay, c'alal chanicubaje, c'alal chamey no'ox ac'ob chacux avo'ntone,

¹¹ ja'o ta xc'ot ta atojol li me'onal jech chac c'u cha'al jcotcovil ti ch-elc'aje; lec chapal chtal jech chac c'u cha'al j'elec' ti lec chapal chtal xchi'uc yabtejebe.

C'u x'elan stalel chopol cristiano

¹² Li boch'o chopol, ti mu'yuc lec c'usi oy ta yo'ntone, puru va'lupat c'op chloc' ta ye;

¹³ tspas sat sventa chlo'lavan, tspas senyail ta sc'ob, yu'un mu xac' ta a'yel c'usi oy ta yo'nton.

¹⁴ Solel boliben o li sjole; scotol c'ac'al puru chopol c'usi tsnop tspas; puru sa' c'op oy ta yo'nton.

¹⁵ Ja' yu'un ta anil no'ox xu' chtal tsots svocol; ta anil no'ox xu' chcham, mu xa stac' tspoj sba o.

Sc'oplal c'usi ven chopol chil Muc'ul Dios

¹⁶ Oy vacchop c'usi tspas cristiano ti chopol chil li Muc'ul Diose; ma'uc no'ox, oy vucchop li c'usi toj chopol yo'nton yu'une:

¹⁷ ja' li boch'o tstoy sba c'u x'elan sq'uel osile, ja' li boch'o puru epalc'op tspase, ja' li boch'o tsmil xchi'il ti mu'yuc smule,

¹⁸ ja' li boch'o chopol c'usi tsnop ta yo'ntone, ja' li boch'o chbat ta anil xchi'uc yacan ta spasel c'usi chopole,

¹⁹ ja' li j'epalc'op testigoe ti mu meleluc c'usi chale, ja' li boch'o tsocbe sjol xchi'iltaque.

Stojol mulivajel

²⁰ Jnich'on, ch'uno me li mantal chayalbot atote; ich'bo me ta muc' li chanubtasel yu'un ame'e.

²¹ Te me oyuc o ta avo'nton; te xanats'in o jech chac c'u cha'al anats'.

²² Ja' chastojobtasot batel bu chabat, ja' chaxchabiot c'alal chavay; ja' chasc'opanot c'alal chajulov.

²³ Yu'un li mantale ja' luz c'otem, li chanubtasele ja' sac osil c'otem; li tuq'uibtasel xchi'uc li chanubtasele ja' sbelal cuxlejal c'otem.

²⁴ Ja' sventa chascoltaot yu'un jech mu xastsalot li chopol antse, jech mu xalaj ta lo'lael yu'un yan ants ti toj lec ya'yel li sc'ope.

²⁵ Mu me xpich'aj avo'nton yu'un li st'ujumale; mu me slo'labot avo'nton ti c'u x'elan chasq'uelote.

²⁶ Yu'un li vinique ja' no'ox jech chich' lo'lael jech chac c'u cha'al jxox pan yu'un li jmulavil antse; jech ta x'u'ninat o yu'un li antse xchi'uc c'alal ta xch'ulel.

²⁷ Me oy boch'o chac' c'oc' ta sna yo'ntone, ta persa chc'ac' li sc'u'e.

²⁸ Me oy boch'o chanov ta ac'altique, ta persa chc'ac' li yacane.

²⁹ Ja' jech li boch'o ta sc'opanbe yajnil xchi'ile, ta persa tstoj smul.

³⁰ Jech chac c'u cha'al li boch'o ta x'elc'aje, persa ta stoj me ivinaje, ac'o me ta scoj vi'nal i'elc'aj.

³¹ Persa ta stoj vucub velta, persa chac' scotol li c'usi oy yu'une.

³² Ja' yu'un li boch'o chmulivaj xchi'uc yajnil xchi'ile, muc bijuc; ja' no'ox tsa' svocol stuc.

³³ Xu' ta sta majel xchi'uc tsots q'uexlal; j'ech'el ta soc o sc'oplal.

³⁴ Yu'un li yit'ixal yo'nton viniquetique ja' jech chac c'u cha'al c'oc'; mu'yuc xa perdón o yu'un ti c'alal yorail tsc'an tspac sutele.

³⁵ C'usiuc ch-ac'bat sventa chich' lecubtasbel yo'nton, mu xa sc'an o; mu xa xlecub o yo'nton, ac'o me ep matanaletic ch-ac'bat.