Proverbios 4 - Bible in Tzotzil de Chenalhó with Deuterocanon

Taq'uiel ta sventa ac'o cotquintic c'usi lec ta pasel

¹ Jnich'nab, a'yo lec ava'yic c'u x'elan chaxchanubtasoxuc li atotique; tuc'ulanic lec, yu'un jech chlic bijubanic batel.

² Yu'un lec li chanubtasel chacac'boxuque, mu me xach'ay ta avo'ntonic li chanubtasel cu'une.

³ Li vu'une ja' jech ololun to'ox ec; li jtot jme'e toj lec la xc'uxubinun.

⁴ Li jtote ja' jech la xchanubtasun chac li'i: “Comtsano me ta avo'nton ti c'u x'elan chajchanubtasote; ch'uno me li jmantal chacalbote, jech lec chabat.

⁵ Ja' me c'ano li abijile xchi'uc ti oyuc c'usi lec xana'e; mu me xajip xaten ta avo'nton li c'usitic chacalbote.

⁶ Mu me xajip ta avo'nton, yu'un ja' chaxchabiot; tsotsuc me sc'oplal chava'ay, yu'un ja' chastojobtasot.

⁷ Ja'uc no'ox me toj tsots sc'oplal chava'ay li abijile; ja' me c'ano ti chabijube; yu'un ja' tsots sc'oplal ta scotol li c'usitic oy avu'une.

⁸ C'ano me, jech lec chbat ac'oplal yu'un; c'upino me, jech cha'ich'at ta muc' yu'un.

⁹ Ja' chayac'bot lec xnichimal ajol; ja' jech chc'ot jech chac c'u cha'al acorona yu'un”, xiyutun li jtote.

¹⁰ Jnich'on, a'yo me, ch'amo lec ava'ay li c'usi chacalbote, jech ta xnatub lec avorail.

¹¹ Laj xa cac'bot lec avil li be sventa bijubtasele; laj xa cac' xanovan batel ta tuq'uil be.

¹² Me ja' te chaxanov o batele, mu'yuc bu chamac ta be; ac'o me cha'anilaj batel, mu'yuc chabosi avacan.

¹³ Ac'o me lec ta avo'nton li chanubtasel cu'une, mu me xacomtsan; chabio me lec, yu'un ja' sventa acuxlejal.

¹⁴ Mu me ja'uc xatambe batel sbe li boch'otic bolique; mu me xa'och batel yo' bu chanovic li boch'otic chopolique.

¹⁵ Jelovan no'ox, mu me ja'uc xatam batel; voc'o aba, ja' tamo o batel li be atamoje.

¹⁶ Yu'un li stuquique mu x'och svayelic ti me mu'yuc spasic c'usi chopole; mu'yuc vayel ta yo'ntonic ti me mu xyal ta lum junuc yu'unique.

¹⁷ Yu'un ja' xa sve'el cha'yic o li c'usi chopole; ja' xa yuch'um cha'yic o li eleq'ue.

¹⁸ Yan li sbe boch'otic tuc' yo'ntonique lec sac jaman jech chac c'u cha'al chvoc' tal yibel vinajel ta jujun sobe, jech ta c'unc'un tsacub batel ja' to c'alal sac xa o lec li osile.

¹⁹ Yan li sbe boch'otic chopolique ja' jech chac c'u cha'al ic' osil, jech mu xilic bu tsbosi yacanic.

²⁰ Jnich'on, tuc'ulano lec li c'usitic chacalbote; ts'e'ano lec achiquin ta ya'yel li mantal chacalbote.

²¹ Mu me xch'ay ta avo'nton; comtsano lec ta yut avo'nton.

²² Yu'un ja' slequilalic chc'ot li boch'otic chich'ic ta muq'ue; ja' sventa xpoxil sbec'talic chc'ot.

²³ Li c'usi tsots sc'oplal ta scotole ja' tsc'an chanop lec li c'usi chatic' ta avo'ntone, yu'un ja' te chlic tal li acuxlejale.

²⁴ Mu me xloc' ta ave li c'usitic chopole; comtsano me li epalc'ope.

²⁵ Tuc' no'ox xaq'uel osil; mu me yalel muyeluc li asate.

²⁶ Q'uelo me lec ti bu chavac' batel avacane; ja' me te xabat ti bu tuq'uil bee.

²⁷ Mu me xatselbuj ta yolon be xchi'uc ta yac'ol be; mu me xavac' batel avacan ti bu chopole.