Proverbios 30 - Bible in Tzotzil de Chenalhó with Deuterocanon

Sc'oplal c'usi laj yal Agur

¹ Li Agur xnich'on Jaqué liquem ta Masae laj yalbe chanubtaseletic li Itiel xchi'uc Ucale; ja' jech laj yalbe chac li'i:

² Li vu'une jtuc no'ox toj bolun ta scotol li cristianoetique; mu'yuc quich'ojbe sbijil cristiano.

³ Me jutuc mu'yuc jtaoj jbijil; me jutuc mu jna' c'u x'elan oy li Ch'ul Diose.

⁴ ¿Me oy boch'o ayem tal ta vinajel ti ts'acal iyal tale? ¿Boch'o xu' yu'un tstsac ta sc'ob li iq'ue? ¿Boch'o xu' yu'un chchup ta sc'u' li nabe? ¿Boch'o laj yac'be sti'iltac li banamile? ¿Me xu' chavalbicun c'usi sbi xchi'uc c'usi sjol sbi?

⁵ Scotol li c'usitic yaloj Diose puru tuc'; ja' xchabioj scotol li boch'otic spatoj yo'ntonic ta stojole.

⁶ Mu me xavepajes li c'usitic yaloje, yu'un jech mu xata utel, jech mu xacom ta j'epalc'op.

⁷ Dios cu'un, oy chib li c'usi chajc'anbote; mu me xajalanbun yu'un yo'to cuxulun:

⁸ Ja' ta jc'an chaloq'uesbun ta co'nton li c'usi chopole xchi'uc li epalc'ope, xchi'uc mu me xavac' xipas ta me'on, xchi'uc ta jc'ulej; ja' no'ox ac'bun li jve'el ti c'u yepal chtun cu'une.

⁹ Yu'un me ep c'usi oy cu'une xu' chlic ch'ayan ta co'nton, xu' chlic cal ti mu xacotquinote; jech noxtoc, me me'onune xu' chlic elc'ajcun, jech chopol chbat ac'oplal cu'un, vo'ot li Diosot cu'une.

¹⁰ Mu me xatic'be smul ta stojol yajval li mozoe, yu'un naca me oy c'usi chopol spasbot, jech xu' chata avocol.

¹¹ Oy boch'otic ta xchopolc'opta li stotique, xchi'uc mu'yuc lec chalbeic sc'oplal li sme'ique.

¹² Oy boch'otic tsnopic ti toj lequique, pero mu'yuc scomtsanojic li xchopolilique.

¹³ Oy boch'otic stuc no'ox yac'oj sbaic; stoyoj no'ox sbaic ta stojol li xchi'ilique.

¹⁴ Oy boch'otic xco'laj xchi'uc espada ya'yel li stanal yeique; xco'laj xchi'uc cuchilo ya'yel li xchobique, yu'un chulesic o scotol li me'onetic ta banamile xchi'uc li boch'otic abul no'ox sbaique.

¹⁵ Li' ta banamile oy c'usi mu sna' xpaj yo'nton ta ve'el: “Ac'bun, ac'bun”, xi. Oy chanib li c'usi mu xnoj xch'utic o, ti mu ono'ox ta'louc cha'yic oe:

¹⁶ ja' li muquinaltique, ja' li ants ti mu sna' x'alaje, ja' li banamil ti chuch'ilan no'ox batel li vo'e, xchi'uc li tocalte'e.

¹⁷ Li boch'o tsna'le stote xchi'uc ti tsbajbe smantal sme'e ja' smoton ti ac'o yich' loq'uesbel sbec' sat yu'un jojetique, xchi'uc ti ac'o yich' ti'el yu'un xiquetique.

¹⁸ Oy chanib li c'usi mu jna'be smelole, ti mu jna' c'u x'elane:

¹⁹ ja' ti c'u x'elan chvil ta toyol li xique, ti c'u x'elan chanov ta tontic li quiletel chonetique, ti c'u x'elan chanov ta ba muc'tic nab li barcoe, xchi'uc ti c'u x'elan xu' tsc'an sbaic xchi'uc ants li vinique.

²⁰ Li ants ti mu junuc yo'nton ta stojol smalale, c'alal slajel yo'nton ta ve'ele, ta suc' lec ye, jech chal: “Mu'yuc ve'emun”, xi.

²¹ Oy chanchop c'u x'elan oy li cristianoe, ti chliquic ta vochlajetel li cristianoetic yu'une, ti mu lecuc chilique:

²² ja' ti c'alal chlic ochuc ta ajvalilal li mozoe, ti ja' oy ep sve'el li boch'o bolique,

²³ xchi'uc ti ta to sta smalal li ants ti sbajbenal xae, xchi'uc li quiara ti ch-och ta xq'uexol sme' ajvale.

²⁴ Oy chanchop bic'tal chonetic li' ta banamil; ja' xjelov to sbijilic c'otem yu'unic li boch'otic bijique:

²⁵ ja' li xinichetique lec epic, pero mu'yuc ep stsatsalic, pero lec sna'ic tsobel sve'elic ta yorail q'uepelaltic;

²⁶ xchi'uc li cotometique ja' mu'yuc tsots slomoic, pero lec spasoj snaic ta ch'entic;

²⁷ xchi'uc noxtoc li c'ulubetique mu'yuc ajvalil yu'unic, pero lec xcholet chanovic;

²⁸ xchi'uc li om ti xu' no'ox ta jt'us ta jc'obtique, pero xu' ch-och c'alal ta spasubmantal ajvalil.

²⁹ Oy chanib li c'usi toj lec xu' yu'unic xanubale, ti xteq'uet no'ox chanovique:

³⁰ ja' li león ti toj xi'bal sba ta scotol yantic chonbolometique, me jutuc mu c'usi sna' xi' yu'un,

³¹ xchi'uc li te'tical cotstuluq'ue, li tot tentsune, xchi'uc li ajvalil ti xteq'uet no'ox ta stojol steclumale.

³² Me oy chavovil toy no'ox abae, me oy c'usi chopol chanope, me laj ava'ay abae, pajeso me aba.

³³ Yu'un me chajuyilan lec li ya'lel xchu' vacaxe, chata mantequilla; me yipal chamaj ani'e, ta xloc' xch'ich'al, me chasa'ilanbe sjol achi'ile, ta xlic c'op.