Proverbios 3 - Bible in Tzotzil de Chenalhó with Deuterocanon

Oy c'usi lec ta jtatic me chquich'tic ta muc' li bijubtasele

¹ Jnich'on, mu me xch'ay ta avo'nton li chanubtasel cu'une; chabio me ta avo'nton li jmantaltaque,

² jech ta xnatub avorail, xchi'uc jech lec chabat.

³ Mu me xacomtsan li c'uxubinvaneje xchi'uc li yalel c'usitic melele. Pasilano jech chac c'u cha'al li boch'o te xojol o ta snuc' snats'e; te ts'ibabil ac'o comuc o ta avo'nton.

⁴ Jech lec cha'ilat, lec ac'oplal ta stojol Dios xchi'uc ta stojol cristianoetic.

⁵ Ja' no'ox pato avo'nton ta stojol li Muc'ul Diose; mu me ja'uc xapat avo'nton yu'un li abijil atuque.

⁶ Ac'o sventain Muc'ul Dios scotol li c'usi chapase, yu'un ja' xu' chayic'ot batel ta tuq'uil be.

⁷ Mu me xanop ti toj bijote; ja' ich'o ta muc' li Muc'ul Diose, voc'o aba ta sventa li c'usi chopole.

⁸ Yu'un ja' poxil sventa abec'tal; ja' sventa tstsatsub o lec abaquiltac.

⁹ Ich'o ta muc' Muc'ul Dios ta sventa li c'usitic oy avu'une, xchi'uc ta sventa li sba sat c'usitic chloc' avu'une.

¹⁰ Jech ta xnoj snail li c'usitic oy avu'une; ta xlic tanijuc loq'uel, xchi'uc ta xlic malanuc loq'uel ta sti'ti' yaviltac li ya'lel ats'usube.

¹¹ Jnich'on, mu me chopoluc xava'ay c'alal chayac'bot nucul li Muc'ul Diose; mu me x'ech' avo'nton yu'un li taq'uiel chayac'bote.

¹² Yu'un li Muc'ul Diose ta xac'be nucul li boch'o lec sc'anoje; ja' jech chac c'u cha'al jun totil ti tstaq'ui lec xnich'on ti lec sc'anoje.

¹³ Toj xcuxet no'ox yo'nton li boch'o ta sta lec sbijile; lec jun yo'nton li boch'o oy c'usi lec sna'e.

¹⁴ Yu'un ja' jeloven to c'usi tsta o, ja' jutuc c'usi tsta ta sventa li saquil taq'uine; ja' toj ep c'usi chloc' o yu'un, ja' jutuc c'usi tsta ta sventa li c'anal taq'uine.

¹⁵ Ja' toj ven c'upil sba c'otem xchi'uc; ja' xcom slequil li tonetic ti lec c'upilic sbae. Mu xco'laj xchi'uc jech chac c'u cha'al li c'usi toj c'upilic sba chquiltique.

¹⁶ Ta sbats'ic'obe ja' te oy nat yorail; ta sts'etc'obe ja' te oy sc'ulejal xchi'uc yich'el ta muc'.

¹⁷ Li be bu stamoj batele toj jun yutsil; toj jun no'ox yo'nton o ta sventa scotol li c'usitic tspase.

¹⁸ Li jbijiltique ja' jech chc'ot jech chac c'u cha'al te' sventa cuxlejal ta sventa li boch'otic tsc'ane; xcuxet no'ox yo'ntonic li boch'o laj xa sta sbijilique.

¹⁹ Li Muc'ul Diose ta sventa sbijil la snacan li banamile; ta sventa sbijil la xlich'an li vinajele.

²⁰ Ta sventa sbijil la svoc' sba yu'un li muc'tic nabetique, xchi'uc ta sventa sbijil tsyales tal li job osil ta vinajele.

²¹ Jnich'on, mu me xch'ay ta avo'nton li c'usitic lec laj calbote; ch'uno me li mantal xchi'uc taq'uiele.

²² Yu'un ja' sventa alequilal; ja' chast'ujumtasot jech chac c'u cha'al nats'il.

²³ Jech jun avo'nton buyuc no'ox chaxanov; mu xabosi o avacan.

²⁴ C'alal chacux avo'ntone, mu'yuc c'usi xi'bal sba chava'ay; c'alal chamochi ta avayabe, jun avo'nton chavay.

²⁵ Mu'yuc chaxi' yu'un li c'usi xi'bal sba ti ta anil no'ox chtale; mu'yuc chaxi' noxtoc ti c'alal chtal tsots svocol li boch'otic chopol yo'ntonique.

²⁶ Yu'un ja' chayac'bot smuc'ul avo'nton li Muc'ul Diose; ja' chaxchabiot jech mu xa'och ta yoquil.

²⁷ Mu me xajalan aba ta spasel c'usi lec ta stojol li boch'o oy svocole; paso me ti c'alal xu' avu'un spasele.

²⁸ Mu me jechuc xavalbe li achi'ile: “Sutan, ts'acal xu' chatal; oc'om to van xu' chacac'bot”; mu me xavutuc ti c'alal oy avu'un li c'usi xu' chavac'bee.

²⁹ Mu me c'usi chopol xanop chapasbe li achi'il ti spatoj yo'nton ta atojol te nacal ta ats'ele.

³⁰ Mu me boch'o xavovil sa' no'ox ta c'op ti c'alal mu'yuc c'usi chopol spasojbote.

³¹ Mu me xti'etuc avo'nton yu'un li boch'o muc tuc'uc yo'ntone; mu me xatam batel junuc li beetic stamoje.

³² Yu'un li Muc'ul Diose toj chopol chil li boch'otic chopolique; yan li boch'otic tuc' yo'ntonique lec co'ol yo'ntonic xchi'uc.

³³ Li stojol mulil yu'un Muc'ul Diose te oy ta sna li boch'otic chopolique; yan li boch'otic tuc' yo'ntonique ta xac'be lec bendición ta sna.

³⁴ Li Muc'ul Diose ta sna'le li boch'otic chna'levanique; yan li boch'otic biq'uit yac'oj sbaique ta xc'uxubin.

³⁵ Li boch'otic bijique ta staic lec ich'el ta muc'; yan li boch'otic bolique ta x'ac'atic ta q'uexlal.