Proverbios 29 - Bible in Tzotzil de Chenalhó with Deuterocanon

¹ Li boch'o ta stoy sba c'alal chich' taq'uiele, ta soc o; mu xa stac' poxtael o.

² C'alal ja' chlic spasic mantal li boch'o tuc' yo'ntonique, xcuxet no'ox yo'ntonic li jteclume; c'alal ja' chlic spas mantal li boch'otic chopolique, ta xlic svocol li jteclume.

³ Me lec cha'ay bijubtasel li nich'onile, xcuxet no'ox yo'nton yu'un li stote; yan me ja' batem yo'nton yu'un jmulavil antse, jeche' no'ox chixtan li staq'uine.

⁴ Me tuc' ta xchapanvan li ajvalile, lec chbat li slumale; yan me ja' no'ox ta sloq'ues taq'uine, ta soc yu'un li slumale.

⁵ Li boch'o tsmacbe sat xchi'ile, te no'ox ta syac sba stuc.

⁶ Li boch'o chopole ja' spets'ul chc'ot li smul stuque; yan li boch'o tuc' yo'ntone xcuxet no'ox yo'nton, xq'uejin no'ox.

⁷ Li boch'o tuc' yo'ntone oy ta yo'nton tscolta li me'onetique, pero li boch'o chopole mu sventauc.

⁸ Li jlabanvanejetique ja' no'ox ta sa'beic sjol sjunul lum; yan li boch'otic tuc' yo'ntonique sna' c'u x'elan tslamesic li c'ope.

⁹ Me chnitvan ta chapanel li boch'o bije, li boch'o bole ja' no'ox ta x'ilin, ta xlabanvan; mu'yuc c'usi lec ta xchapaj o yu'unic.

¹⁰ Li jmilvanejetique chopol chilic li boch'o lequique; li boch'otic chopolique tsnop c'u x'elan xu' tsmilic li boch'o tuc' yo'ntonique.

¹¹ Li boch'o bole mu xu' yu'un spajesel li sc'ac'al yo'ntone; yan li boch'o tuc' yo'ntone xu' yu'un tspajes sba.

¹² Me oy jun ajvalil chch'un li c'usitic mu meleluque, chopol chbat scotol li j'abteletic yu'une.

¹³ Li boch'o uts'intabil xchi'uc li boch'o ch-uts'intavane oy c'usi co'ol lec tstaic, yu'un co'ol ac'bil sq'uelic saquil osil xchibalic yu'un li Muc'ul Diose.

¹⁴ Me lec tuc' chchapan me'onetic li ajvalile, j'ech'el mu xlaj o sc'oplal li yabtel ta ajvalilale.

¹⁵ Li nucul xchi'uc taq'uiele ja' sventa chbijub li ololetique; yan li querem ti te no'ox q'uelbile ja' no'ox chac' ta q'uexlal li sme'e.

¹⁶ C'alal me ta x'epaj li boch'otic chopolique, ta x'epaj noxtoc li mulile, pero li boch'otic tuc' yo'ntonique ta to xilic c'u x'elan ta xich'ic ulesel.

¹⁷ Taq'uio lec li anich'one, jech jun avo'nton yu'un, jech xcuxet no'ox avo'nton.

¹⁸ Ti bu mu'yuc j'alc'op yu'un Diose chopol chijbatutic; me chquich'tic ta muc' li smantal Dios chij'albate, xcuxet no'ox co'ntontic.

¹⁹ Oy mozoetic ti mu xlecub ta eil no'oxe; ac'o me cha'ay, pero mu xich' ta muc'.

²⁰ Me oy xavil jun vinic ti ta anil no'ox chtac'ove, le'e ja' toj ven chopol ja' xu' to jutuc li jun bol vinique.

²¹ Li boch'o stotinoj smozo c'alal biq'uit toe, ts'acal xu' chlic ventainbatuc scotol li c'usitic oy yu'une.

²² Li boch'o toj simarone ep ta sliques c'op; li boch'o toj biq'uit yo'ntone ep ta sta smul.

²³ Li jtoybae ta syalesat yu'un li stoyobbaile; yan li boch'o biq'uit chac' sbae ta x'ich'at ta muc'.

²⁴ Li boch'o tsc'an ta xchi'in j'eleq'uetique ta xac' sba ta vocolajel stuc, yu'un me te xa oy ta chapanele, mu xa sna' c'usi chut sba.

²⁵ Me ja' chijxi'utic yu'un li cristianoetique, ta xchucvan jech chac c'u cha'al lasu; yan me ja' ta jpat co'ntontic ta stojol li Muc'ul Diose, mu'yuc xi'el chca'itic.

²⁶ Ep boch'o tsa'ic, ep boch'o tsc'anic coltael ta stojol li ajvalile, pero ja' jchapanvanej stuc li Muc'ul Diose.

²⁷ Li boch'o chopolique chopol chilic li boch'o tuc' yo'ntonique; ja' no'ox jech ec li boch'o tuc' yo'ntonique mu'yuc lec chilic li boch'o chopol c'usi tspasique.