Proverbios 28 - Bible in Tzotzil de Chenalhó with Deuterocanon

¹ Li boch'o chopol yo'ntone jech no'ox chjatov, ac'o me mu'yuc nutsbil; yan li boch'o tuc' yo'ntonique jun yo'nton chcux jech chac c'u cha'al jcot león.

² Me oy jun lum chopol chbate, ep jpasmantaletic chjelovic ta abtel, pero me oy junuc ajvalil lec bij, lec ch-abteje, mu'yuc c'op cha'yic.

³ Li chopol cristiano ti chac'be svocol me'onetique ja' jech chac c'u cha'al tsatsal ic'al vo' ti tsoques scotol c'usitic ts'unbile.

⁴ Li boch'o ta sbajic mantaletique chalic ti ja' lequic li boch'o chopolique; ja' xa chopol chlic yilic li boch'o chch'unic mantale.

⁵ Li boch'o chopolique mu xa'ibeic smelol li c'usi tuq'ue; yan li boch'o ja' ta sa'ic Muc'ul Diose lec cha'ibeic smelol scotol.

⁶ Ac'o me me'onutic no'ox, me lec jc'oplaltique ja' toj lec; ac'o me jc'ulejutic, me chopol c'usi oy ta co'ntontique ja' mu'yuc stu.

⁷ Li boch'o chich' ta muc' smantal Diose ja' bijil nich'onil; yan li boch'o ja' chchi'in sba xchi'uc jchaquinometique ta xac' ta q'uexlal li stote.

⁸ Li boch'o tspas ta jc'ulej xchi'uc sjol staq'uine ac'o yich' pojbel sventa chich' c'uxubinel li me'onetique.

⁹ Li boch'o mu sc'an xa'ibe smantal Diose ja' no'ox jech mu x'aybat sc'op yu'un Dios ec ti c'alal tsc'opane.

¹⁰ Li boch'o tsc'an ac'o sta svocol li boch'o tuc' yo'ntonique ja' chc'ot ta stojol stuc li c'usi snopoje; yan li boch'o tuc' yo'ntonique lec c'usi tstaic.

¹¹ Li jc'uleje tsnop ti lec bije, pero li me'on ti sna'be lec smelole sna'oj ti mu'yuc sbijile.

¹² C'alal chlic spas mantal li boch'o tuc' yo'ntonique, xcuxet no'ox yo'nton li cristianoetique; yan me ja' chlic spas mantal li boch'o chopol yo'ntonique, ta xi'ic li cristianoetique.

¹³ Li boch'o ta smuc smule mu'yuc lec chbat; yan li boch'o jamal chal, xchi'uc me tscomtsane, ch'aybil chc'ot smul.

¹⁴ Xcuxet no'ox yo'nton li boch'o j'ech'el yich'oj o ta muc' Diose; yan li boch'o tspas ta tsots yo'ntone ja' no'ox ta sta svocol.

¹⁵ Li chopol vinic ti ochem ta jpasmantal ta stojol me'onetique ja' jech chac c'u cha'al jcot león ti xme'et no'oxe, jech chac c'u cha'al jcot oso ti chvoch'ivane.

¹⁶ Me ch-och ta jpasmantal li chopol vinique, ta x'epaj li uts'intaele, yan li boch'o muc ja'uc chbat yo'nton yu'un sc'ulejale jal ta xcuxi.

¹⁷ Li boch'o ta xmilvane oy svocol o c'alal to chbat ta muquinaltic, xchi'uc mu'yuc boch'o xu' ta spoj.

¹⁸ Li boch'o tuc' no'ox chanove jun yo'nton; yan li boch'o sa'sun no'oxe ta ono'ox sta svocol.

¹⁹ Li boch'o sna' x'abteje ta sta lec sve'el; yan li boch'o ch'aje mu'yuc c'usi x'ayin o yu'un.

²⁰ Li boch'o lequil vinique ta xich' ep bendición; yan li boch'o batem yo'nton tspas c'u x'elan tsta sc'ulejale ja' no'ox ta sa' ep smul.

²¹ Li boch'o t'ujbil no'ox boch'o chc'uxubine mu lecuc, yu'un ta jutuc no'ox taq'uin xu' ta soques li c'usi lec ta pasele.

²² Li xpich'etel co'ntontique chisujutic ta sa'el li jc'ulejaltique; mu jna'tic me nopol xtal stsacutic li me'onale.

²³ Li boch'o tstaq'uiutique ts'acal tsta lec tojbel ta vocol; ja' chopol li boch'o lec no'ox chil c'usi ta jpastique.

²⁴ Li boch'o chal ti mu muliluc me chelc'anbe c'usi oy yu'un stot sme'e ja' co'ol xchi'uc jmilvanej chc'ot.

²⁵ Li boch'o ep c'usi chpich'-o'ntae ja' no'ox ta sliques c'op; yan li boch'o ja' spatoj o yo'nton ta stojol Muc'ul Diose lec c'usi tsta batel.

²⁶ Li boch'o xu' no'ox yu'un stuc cha'ye ja' bol cristiano; yan li boch'o tstunes lec sbijil c'alal oy c'usi tspase, lec chbat yu'un.

²⁷ Li boch'o tscolta me'onetique mu'yuc c'usi sc'an yu'un; yan li boch'o mu xcoltavane ta sta ep svocol.

²⁸ C'alal me ja' tspasic canal li boch'o chopolique, li cristianoetique ta xi'ic; c'alal me ichamique, ta x'epaj li boch'otic tuc' yo'ntonique.